Tuesday, December 31, 2013

" ವ್ರತ "

ಏಕೋ ಏನೋ ನಿಂದು ಅತಿಯಾಯ್ತು ಕಣೆ
ನೀ ಮಾಡುವ ಪ್ರತಿನಿತ್ಯದ ಅಡುಗೆಗೆ
ಎಲ್ಲವೂ ಉದ್ದುದ್ದದ ತರಕಾರಿಗಳೇ ಬೇಕೇನೋ
ನನಗೂ ಕಹಿಯ ತಿಂದು ತಿಂದು ಸಾಕಾಯ್ತು
ಮೊನ್ನೆ ಹಾಗಲಕಾಯಿಯ ಗೊಜ್ಜು, ಮೂಲಂಗಿ ಸಾರು
ನಿನ್ನೆ ಸೋರೆಕಾಯಿ ಪಲ್ಯ, ಹೀರೆಕಾಯಿ ಚಟ್ನಿ
ಇಂದು ನುಗ್ಗೆಯ ಸಾಂಬಾರು, ಬೆಳ್ಳುಳ್ಳಿ ಕೂಟು
ನಾಳೆಗೆ ಏನು ಕಾದಿದೆಯೋ ಆ ಪರಮಾತ್ಮನೇ ಬಲ್ಲ !

ರ್ರೀ... ಗಂಡು ಮಗು ಬೇಕೋ ಬೇಡವೋ ನಮಗೆ ?
ಸುಮ್ಮನೆ ತಿಂದು ತೆಪ್ಪಗೆ ನನ್ನ ಹಿಂದೆ ರೂಮಿಗೆ ಬನ್ನಿ
ಹಾಗೆಯೇ ಅಲ್ಲಿಟ್ಟಿರುವ ಕಷಾಯವ ಕುಡಿದು,
ಈ ಬೇವಿನ ಸೂಪ್ಪು ಸೊಂಟದ ಸುತ್ತಾ ಕಟ್ಟಿ
ಬರೀ ಮೈಯಲಿ ಒಂಟಿ ಕಾಲಲ್ಲಿ ನಿಲ್ಲಿ ;
ಹುಣ್ಣಿಮೆಯಿಂದ ಹುಣ್ಣಿಮೆವರೆಗೂ ವ್ರತ
ಮದ್ಯದಲ್ಲಿ ನನ್ನ ಮುಟ್ಟಿ ವ್ರತ ಕೆಡಿಸಿದಿರೋ
ಪ್ರತಿನಿತ್ಯ ಬೆಳಗಿನ ಜಾವ ತಣ್ಣೀರಲ್ಲಿ ಸ್ನಾನ,
ಮುಚ್ಚಿರಬೇಕು ಲಂಗೋಟಿಲಿ ನಿಮ್ಮ ಮಾನ
ಅರ್ಥವಾಯ್ತೇ, ಇಲ್ಲಾಂದರೆ ಈಗಲೇ ಇದ ಓದಿ
ಮಹಾತ್ಮರು ಬರೆದ " ಸಂತಾನ ಭಾಗ್ಯ " ಪುಸ್ತಕ !!

ಲೆ ಲೇ... ನಿನಗೇನಾದ್ರೂ ತಲೆ ಕೆಟ್ಟಿದೆಯೇ
ಮುದ್ದಾದ ಎರಡು ಅವಳಿ ಹೆಣ್ಮಕ್ಕಳಿರುವಾಗ
ಗಂಡು ಗಂಡೆಂದು ನೀನೇಕೆ ಬಾಯ್ ಬಿಡುವೆ
ಗಂಡಿದ್ದರೆ ನಿನಗೇನು ಎರಡು ಕೋಡು ಬರುವುದೆ
ನಾ ಏನಾದರು ಹೇಳಿದರೆ ನೀ ಕಣ್ಣೀರ ಸುರಿಸುವೆ ॥

Sunday, December 22, 2013

" ಕ್ರಿಸ್‌ಮಸ್ ಶಾಪಿಂಗ್ "

ರ್ರೀ... ಸ್ವಾಮಿ ಮಹಾಪ್ರಭುಗಳೇ,
ಮೇಲೇಳಿ ನಿದ್ದೆ ಮಾಡಿದ್ದು ಸಾಕು
ಆಗಲೇ ಗಂಟೆ ಹನ್ನೊಂದಾಯ್ತು ;
ಸೂರ್ಯ ನೆತ್ತಿಯ ಮೇಲೆ ಬರುವ ಮುಂಚೆ
ಮಾರ್ಕೆಟ್ ಗೆ ಹೋಗಿ ಹಣ್ಣು ತರಕಾರಿಯ ತನ್ನಿ !

ಲೆ ಲೇ.... ನಿನ್ನದೇನೇ ಸುಪ್ರಭಾತ
ವಾರದಲ್ಲಿ ಸಿಗುವ ಒಂದು ರಜಾ ದಿನ
ನಾ ನೆಮ್ಮದಿಯಾಗಿ ನಿದ್ದೆ ಮಾಡುವಂತಿಲ್ಲ
ಯಾವಾಗಲೂ ನಿಂದು ಇದ್ದದ್ದೇ ರಾಮಾಯಣ
ನನ್ನ ರೇಗಿಸಬೇಡ ಸುಮ್ಮನೆ ಒಳ ಹೋಗು
ಇಲ್ಲದಿದ್ದರೆ ನೀನೂ ಬಂದು ತೆಪ್ಪಗೆ ಮಲಗು !

ರ್ರೀ... ನಿಮಗೇಳುವುದ ನಾ ಮರೆತಿದ್ದೆ
ಯಾರೋ ಮಾರ್ಗರೇಟಂತೆ
ಎರಡೆರಡು ಬಾರಿ ಫೋನ್ ಮಾಡಿದ್ದರು
ನಿಮಗೇಕೆ ತೊಂದರೆ ಎಂದು ಸುಮ್ಮನಾದೆ
ಎಲ್ಲಿ ನನ್ನ ಬೈಯ್ಯುವಿರೆಂದು ಎಬ್ಬಿಸಲಿಲ್ಲ !

ಅಯ್ಯೋ ...... ನಿನ್ನ ಮಕ್ಕೇ....
ಎಬ್ಬಿಸಬಾರದಿತ್ತೇನೇ... ಹಾಳಾದವಳೆ
ಎಲ್ಲಾ ನಿನ್ನಿಂದ ಹಾಳಾಯ್ತು ನೋಡು,
ಕ್ರಿಸ್ಮಸ್ ಶಾಪಿಂಗ್ ಗೆ ಕರೆದೊಯ್ಯಬೇಕಿತ್ತು
ನನ್ನ ಬಾಸ್ನ ಬಾಸು ಇನ್ನೇನು ಮಾಡುವಳೋ !

Friday, December 20, 2013

" ವ♢ಡರ್ ಗಣ್ಣು "

ಅಳಿಯಂದರಿಗೇಕೇ ಸೌಗಂಧಿಕಾ ...
ನನ್ನ ಮೇಲೆ ಒಂದು ರೀತಿಯ ಕೆಟ್ಟ ಕಣ್ಣು,
ನನಗೆ ಒಂಥರಾ ಆಗುತ್ತೆ ಕಣೆ ಅವರ ನೋಡಿದರೆ !
ಈ ಪ್ರಾಣಿ, ಹೆಂಗಸರನ್ನು ಕಂಡೇ ಇಲ್ಲವೋ ಏನೋ ?
ಹೀಗೆ ನೋಡಿ ಹಪಹಪಿಸಿ ಜೊಲ್ಲು ಸುರಿಸುವುದೇ ... ? ಯಾವುದಕ್ಕೂ ನಿನ್ನ ಗಂಡನ ಮೇಲೆ ಒಂದು ಕಣ್ಣಿಟ್ಟಿರು !
ನನ್ನ ಅಕ್ಕ, ಈ ಹುಂಬನಿಗೆ ನಿನ್ನ ಕೊಟ್ಟು ಕೆಟ್ಟರು ;
ನಾ ಹೇಳುವುದ್ದೆಲ್ಲಾ ನಿನಗೆ ಹೇಳಿಯಾಗಿದೆ
ಇಷ್ಟರ ಮೇಲೆ ನಿನ್ನ ಇಷ್ಟಾ ಕಣೇ ಸೌಗಂಧಿಕಾ
ನಾನೇ ಉಗಿದು ಉಪ್ಪು ಹಾಕೋಣ ಎಂದರೆ
ನಿನ್ನ ಬಾಳೆಲ್ಲಿ ಮೂರಾ ಬಟ್ಟೆಯಾಗುವುದೋ ಎಂದು ಹೆದರಿ,
ನಾ ಇಂದು ಸುಮ್ಮನಿರಬೇಕಾಗಿದೆಯೇ
ಇಲ್ಲದಿದ್ದರೆ ಆ ಕತೆಯೇ ಬೇರೆಯಾಗುತ್ತಿತ್ತು ಬಿಡು !
ಅಯ್ಯೋ.... ಚಿಕ್ಕಮ್ಮಾ.... ,
ನಿಮಗೇನು ತಲೆಗಿಲೆ ಕೆಟ್ಟಿದೆಯೇ,
ಕಣ್ಣು ಕುರುಡೆ ಅಥವಾ ಅರಳು ಮರುಳೋ
ನನ್ನವರು ಎಂದೂ ಅಂತವರಲ್ಲ ತಿಳೀತೆ
ಯಾವುದಕ್ಕೂ ಡಾಕ್ಟರ್ ಬಳಿ ಹೋಗಿ ಕಣ್ಣು ಪರೀಕ್ಷಿಸಿ ಕೊಳ್ಳಿ ಇಲ್ಲದಿದ್ದರೆ ತೆಪ್ಪಗೆ ಈಗಲೇ ಊರಿಗೆ ಹೊರಡಿ
ಏನೋ ನನ್ನವರಿಗೆ ಹುಟ್ಟಿನಿಂದ ಮೆಳ್ಳಗಣ್ಣಷ್ಟೆ
ಅವರೆಲ್ಲೋ ನೋಡಿದರೆ ನಮ್ಮನ್ನೇ ನೋಡಿದಂತೆ ಕಾಣುತ್ತೆ, ಅದು ಅವರ ತಪ್ಪೇ.... ? ನೀವೇ ಹೇಳಿ ?
ಕ್ಷಮಿಸೇ..... ನನ್ನನ್ನ , ಸೌಗಂಧಿಕಾ .....
ಏನೋ......ಹಾಳಾದ್ದು ತಪ್ಪಾಗಿ ಹೋಯಿತು
ಅಳಿಯಂದಿರು ಈ ಮಾತ ಕೇಳಿಸಿಕೊಂಡರೆ
ನನ್ನ ಬಗ್ಗೆ ಏನೆಂದು ತಿಳಿದಾರು ಇನ್ನು ಅಕ್ಕಬಾವನಿಗೆ ಗೊತ್ತಾದರೆ ನನ್ನ ಜನ್ಮ ಜಾಲಾಡಿಸದೆ ಬಿಡರು
ಹೋಗಲಿ ಬಿಡು, ನಿನ್ನ ಗಂಡನಿಗೆ ವಂಡರ್ ಗಣ್ಣೇ ..... !?

Wednesday, December 18, 2013

" ಬೇಡ ಸ್ವಾಮಿ ನನ್ನ ಫಜೀತಿ " ಭಾಗ - ೨

ನನಗೆ  ಯಾಕಾದರು
ಇಂತಹ ಹೆಸರಿಟ್ಟರೋ
ನನ್ನ ಮುದ್ದಿನ ಅಪ್ಪ ಅಮ್ಮ ,
ಬೇಕಿತ್ತೆ ಅಣ್ಣಯ್ಯ ಎಂದು
ಕಿರಿಯರಿಂದಿಡಿದು
ಹಿರಿಯರಾದಿಯಾಗಿ
ನನ್ನ ಹೆಸರಿಡಿದು ಕರೆವಾಗ
ನನಗೋ ಖುಷಿಯೋ ಖುಷಿ;
ಮದುವೆಯ ಮೊದಲ ರಾತ್ರಿಯಲಿ
ನನ್ನವಳು ಹಾಲಿಡಿದು, ಹಲ್ಕಿರಿದು
ಬಳುಕಿ ವಯ್ಯಾರದಿ ಬರುವಾಗ
ನಾ ಏನೇನೋ ಕನಸ ಕಂಡಿದ್ದೆ;
ಹಾಲು ಕುಡಿದು, ಬಾಯಿ ಒರಸಿ
ನಗೆ ಬೀರಿದ್ದೆ, ನಾ ಇಂದು ಸುಖಿ ಎಂದು
ನನ್ನವಳು ಕಿವಿಯಲ್ಲಿ ಅಣ್ಣಯ್ಯ ಎಂದು
ಮೆಲ್ಲನೆ ಬಂದು ಉಸಿರಿದಾಗಲೇ  
ನನಗೆ ಏರಿದ್ದ ಬಿಸಿ ಒಮ್ಮೆಲೇ  ತಣ್ಣಗಾಗಿದ್ದು !  

Tuesday, December 17, 2013

" ಬೇಡ ಸ್ವಾಮಿ ನನ್ನ ಫಜೀತಿ " ಭಾಗ - ೧

ನಾ ಹೇಗೆ ಕರೆಯಲಿ ಹೇಳಿ
ನನ್ನವಳ ಹೆಸರಿಡಿದು ,
ಹಾಗೆ ಕರೆಯಲು ನನಗೆಂದೂ
ನನ್ನ ಮನ ಒಪ್ಪದು
ಬೇರೆ ಹೆಸರಿಡಿದು ಕರೆಯುವ ಎಂದರೆ
ನನ್ನವಳು ಸುತರಾಂ ಒಪ್ಪಳು
ಲೇ ಬಾರೇ ಇಲ್ಲಿ ಎಂದರೆ
ಅವಳಿಗೆ ಎಲ್ಲಿಲ್ಲದ ಸಿಟ್ಟು;
ಚಿನ್ನ ರನ್ನ ಎನ್ನಲು ನನಗೆ ಬರದು
ನೋಡು ಮೊದಲು ಆ ನಿನ್ನ ಹೆಸರ,
ಈಗಿನ ಕಾಲಕ್ಕೆ ತಕ್ಕಂತೆ ಬದಲಾಯಿಸಿಕೋ 
ಸಿಂದು, ಬಿಂದು, ಲಾವಣ್ಯ ಎಂದು
ಹಾಗೆ ಕರೆಯಲು ನನಗೂ ಚೆನ್ನ
ನಾನೇಕೆ ಹೆಸರ ಬದಲಾಯಿಸಿ ಕೊಳ್ಳಲಿ
ನನ್ನ ಅಜ್ಜ ಅಜ್ಜಿ ಮುದ್ದಿನಿಂದಿಟ್ಟ ಹೆಸರು;
ಅಕ್ಕಮಹಾದೇವಿ ಎಂದು ಕರೆಯಲಾಗದಿದ್ದರೆ
ಶಾರ್ಟಾಗಿ, ಸ್ವೀಟಾಗಿ ನೀವು ನನ್ನನ್ನ
" ಅಕ್ಕಾ " ಎಂದು ಕರೆಯಿರಿ ಎನ್ನುವದೇ ?

Friday, December 13, 2013

ರಾಮ ರಾಮ

ಆಳಗಸನ ಮಾತ ಕೇಳಿ
ಅಂದು ಕಾಡಿಗಟ್ಟಿದ ಸೀತೆಯ,
ಅಯ್ಯೋಧ್ಯೆಯ ಶ್ರೀರಾಮ ;
ವರದಕ್ಷಿಣೆ ತರಲು ಹೊಡೆದು ಬಡಿದು
ತನ್ನವಳ ತವರಿಗೆ ಕಳುಹಿಸಿದ ಇಂದು
ಅಯ್ಯೋಗ್ಯ ಪರಂಧಾಮ !

ಸಂಸಾರದ ಸರಿಗಮ

ನನ್ನವಳಿಗೆ ನಾ ಆಗಾಗ
ಕೊಡುವದೆಲ್ಲಾ ಕೊಟ್ಟರೆ
ನನ್ನವಳ ಪ್ರತಿ ಮಾತೂ ಸಕ್ಕರೆ
ಅಪರೂಪಕ್ಕೊಮ್ಮೆ ನಾ ರೇಗಿದರೆ
ಆಪತ್ತು ನನ್ನ ಬೆನ್ನಿಗೆ;
ಉಪವಾಸದ ಬರೆ ನನಗೆ ಖರೆ !
ಮುನಿದು ಮುಟ್ಟಾಗುವಳು
ಜಡಿದು ಬಾಗಿಲ, ಒಳ ಸೇರುವಳು
ನಾನೋ ಬಿಸಿ ಬಿಸಿ ಬೆಲ್ಲದಂತವ
ಕೋಪಕೆ ಬೀಗ ಬಡಿದು ರಮಿಸಿದರೆ
ನಗೆ ಬೀರಿ ನನ್ನೊಳು ಒಂದಾಗುವಳು !

ಹೃದಯದ ಪಿಸು ಮಾತು

ಹೃದಯವೆ
ಕೂಗಿ ಕರೆಯಲು
ನಿನ್ನನ್ನೂ
ಮರೆಯದೆ
ಕೇಳು
ಮನದ ಮಾತನ್ನೂ;
ಕಣ್ಣಲೇ
ನಾ ಹೇಳುವೇ
ನಲ್ಲ ನಿನಗೆಲ್ಲಾ
ನಿನ್ನದೇ
ಈ ಬದುಕು
ಜೊತೆಗೆ ನೀನೆಲ್ಲಾ !
ಏಕೋ ಕಾಣೆ
ನನ್ನೊಳಗೆ
ಪ್ರೀತಿಯ ದೀವಳಿಗೆ
ನನ್ನೇ ನೀನು
ಮೈ ಮರೆಸಿರುವ
ಈ ರಸ ಘಳಿಗೆಗೆ
ನಿನಗೇ ನಾ ಸೋತಿರುವೆ !

Wednesday, December 11, 2013

ಸಹಬಾಳ್ವೆ ಭಾಗ - 2

ರ್ರೀ.... ನಿಮಗೇನಾದರೂ,
ತಲೆಗಿಲೆ ಕೆಟ್ಟಿದೆಯೋ ಹೇಗೆ
ಪಿಎ ಆದವಳ ಪ್ರಿಯೆ ಎಂದರೆ
ಆಗುವುದೆಲ್ಲಾ ಹೀಗೆಯೇ;
ತಿಂಗಳಲ್ಲಿ ಹದಿನೈದು ದಿನ
ಅವಳ ಜೊತೆ ಸುಖ ಸಂಸಾರ
ಇನ್ನುಳಿದ ಹದಿನೈದು ದಿನ
ನನ್ನ ಜೊತೆ ಸಂಸಾರ, ವಿಹಾರ
ಕೋರ್ಟಿನ ಆದೇಶ, ಉಪದೇಶ
ಇದಕ್ಕೆ" ಲಿವಿಂಗ್ ಟುಗೆದರ್ " ನ
ಸಂಬಂಧಗಳ ಹೆಸರು ಬೇರೆ ?

ಏನೋ ಆದದ್ದಾಯ್ತು ಹಾಳಾದವಳಿಗೆ
ಒಂದಷ್ಟು ದುಡ್ಡು ಕಾಸು ಕೊಟ್ಟು ಹೆದರಿಸಿ,
ಬಾಯ್ಮುಚ್ಚಿಸಿ ಕಳಿಸದೆ
ಹೀಗೆ ಮನೆಗೆ ಕರೆತರುವುದೆ;
ನಿಮ್ಮ ಹೆಸರಿಗೆ ತಕ್ಕಂತಿದ್ದೀರಿ ಬಿಡಿ
ಎಲ್ಲಾ ನನ್ನ ಪೂರ್ವ ಜನ್ಮದ ಕರ್ಮ
ದುಂಬಿ ಮುಟ್ಟದ ಹೂವು ಇಲ್ಲ,
ಗಂಡ ನೋಡದ ಹೆಣ್ಣಿಲ್ಲಾಂತಾಯ್ತು !

ನಾನೇನೂ ಅವಳ ಜೊತೆ
ಬೇಕೂಂತ ತಪ್ಪೆಸಗಲಿಲ್ಲವೆ ನಿನ್ನಾಣೆಗೂ,
ಪಾರ್ಟಿಯಲ್ಲಿ ಒಂದಷ್ಟು ಮಧಿರೆ ಹೆಚ್ಚಾಗಿ
ನಶೆ ತಲೆಗೇರಿ, ಈಗೆಲ್ಲಾ ಆಯ್ತು ಅಷ್ಟೆ;
ಏನೋ ನಿನ್ನ ಪುಣ್ಯದ ಫಲ
ಎಲೆಕ್ಟ್ರಾನಿಕ್ ಮೀಡಿಯಾ ( ಟಿ ವಿ )
ನ್ಯೂಸ್ ಪೇಪರ್, ಪೊಲೀಸ್ ಮುಂದೆ
ಅತ್ಯಾಚಾರ, ಲೈಂಗಿಕ ದೌರ್ಜನ್ಯ ಅಂತ
ಹೋಗಿ ಕಂಪ್ಲೇಂಟ್ ಕೊಟ್ಟಿದ್ದರೆ ಅವಳು
ಇಷ್ಟೊತ್ತಿಗೆ ನನ್ನ ಸ್ಥಾನ - ಮಾನ,
ಮನೆ - ಮರ್ಯಾದೆ ಹರಾಜಾಗುತ್ತಿತ್ತು 
ಮೊದಲ ಹೆಂಡತಿ ಜೀವಂತ ಬದುಕಿರುವಾಗ 
ಎರಡನೆಯವಳಿಗೆ ಕಾನೂನಿನಲ್ಲಿ
ಮದುವೆಗೆ ಅವಕಾಶವಿಲ್ಲ
ಏನೋ ನೀನು ಮನಸ್ಸು ಮಾಡಿದರೆ 
ಈ ತಾಪತ್ರಯದಿಂದ ಪಾರಾಗ ಬಹುದು ! 

Friday, November 22, 2013

ಪ್ರೀತಿಯ ತಂಗಾಳಿ

ನೀ ಎಲ್ಲೋ
ಬರುತಿರುವ ಮೊದಲೇ
ನನ್ನೆದೆಯು
ಕೂಗಿ ಕೂಗಿ ಹೇಳುತಿದೆ
ಏಕೋ ಏನೋ ನನ್ನೊಳಗೆ
ಹೇಳದೆ ಕೇಳದೆ ಹಾಗೆಯೇ
ನೀ ಬಂದಿಣುಕುವ
ನಿನ್ನಯ ಬಳುಕುವ
ಗೆಜ್ಜೆಯ ತಂಗಾಳಿಗೆ
ಈ ಹೃದಯದಿ ನೀ ಬಿಡಿಸಿದೆ
ಬಣ್ಣದ ಚಿತ್ತಾರದ ರಂಗೋಲಿ ॥

ನೀ ಎಲ್ಲೋ
ಅವಿತಿದ್ದರು ಕೂಡಲೇ
ಈ ಮೈ ಮನಸೆಲ್ಲಾ
ನವಿರೇಳುತಿದೆ
ಏಕೋ ಏನೋ ನನ್ನೆದೆಯೊಳಗೆ
ಎಂದೂ ಕಾಣದ ಸೆಳತದ ಪರಿಗೆ
ಬಿಸಿ ನಿಟ್ಟುಸಿರಿನ
ನಿದಿರೆಗೆ ಜಾರಿದ
ಮರು ಘಳಿಗೆಯೇ
ಕನಸಿನ ಕದ ತೆರೆದು
ಪ್ರೀತಿಯ ಬುತ್ತಿಯ ಬಿಚ್ಚಿ
ಕನಸುಗಳ ಗರಿಕೆದರಿಸುತಿದೆ ॥

Thursday, November 21, 2013

" ಆಧುನಿಕ ನಾರಿ "

ಆ...ಹಾ.... ರಾತ್ರಿಯಾದರೆ ಸಾಕು
ನಿಮಗೆ ನನ್ನ ಮೇಲೆ ಎಲ್ಲಿಲ್ಲದ
ಪ್ರೀತಿ ಉಕ್ಕುಕ್ಕಿ ಬರುತ್ತೆ ನೋಡಿ,
ಸಾಲದಕ್ಕೆ ಆ ನಿಮ್ಮ ಹೊಗಳಿಕೆಗೆ
ನಗೆಯ ಕಚಗುಳಿಗೆ, ಕುಡಿ ನೋಟಕೆ
ನಾನೇ ನಿಮ್ಮೊಳಗೆ ಕರಗಿ ಬಿಡುವೆ !
ರ್ರೀ.... ನೋಡಿ ಕಲಿಯಿರಿ ಅವರನ್ನ
ಏನು ಅನ್ಯೋನ್ಯತೆ, ಎಂಥಹ ಪ್ರೀತಿ
ಒಬ್ಬರನ್ನೊಬ್ಬರು ಬಿಟ್ಟಿರಲಾರದಷ್ಟು ಬಂಧನ ಸಂಜೆಯಾದರೆ ಸಾಕು ನಿಮ್ಮ ಅಪ್ಪ,
ಎಲ್ಲಿಂದಾದರೂ ಸರಿ, ಹೂ ಹುಡುಕಿ
ಮಲ್ಲಿಗೆಯೋ ಸಂಪಿಗೆಯೋ ಸಿಹಿಯ ತರದೆ
ಮನೆಗೆ ಎಂದೂ ಬಂದವರೇ ಅಲ್ಲ;
ಎಂದಾದರೂ ಒಂದು ಮೊಳ ಮಲ್ಲಿಗೆಯ ಹೂ
ನನಗಾಗಿ ಕೊಂಡು ತಂದಿದ್ದೀರ ನೀವು ?
ಹೌದೌದೇ..., ನನ್ನಮ್ಮಇಷ್ಟು ವಯಸ್ಸಾದರೂ
ಹಣೆಗೆ ಕಾಸಗಲದ ಕುಂಕುಮ, ಮುಡಿಗೆ ಹೂವು
ನಿತ್ಯ ಎರಡೂ ಕೆನ್ನೆಗಳಿಗೂ ಅರಿಷಿಣ ಹಚ್ಚಿ;
ಹೊರ ಬಂದರೆ ಸಾಕ್ಷಾತ್ ಮಂಗಳ ಗೌರಿಯೆ ನಿನಗೇಕೋ ಅವರ ಕಂಡರೆ ಹೊಟ್ಟೆಯುರಿ, ಅಸಮಧಾನ ?!
ನೀ ಎಂದಾದರೂ ಹೀಗೆ ಎದಿರು ಬಂದಿರುವೆಯೆ
ನಮ್ಮ ಸಂಸ್ಕೃತಿ ಆಚಾರ ವಿಚಾರಗಳು ಬೇಕಿಲ್ಲ
ನೀ ಎಂದಾದರೂ ಆಚರಣೆಗೆ ತಂದಿರುವೆಯೋ
ದಿನ ನಿತ್ಯ ಜಡೆ ಹೆಣೆಯುವವರು ಯಾರೆಂದು
ಕೂದಲಿಗೆ ಕತ್ತರಿ, ಜಡೆಯ ಜಾಗದಲ್ಲಿ ಬಾಬ್ ಕಟ್
ಇನ್ನು ಸೀರೆಗೆ ಬದಲಾಗಿ ಜೀನ್ಸ್ ಪ್ಯಾಂಟ್ ಟೀ ಶರ್ಟ್ ಇವೆಲ್ಲಾ ಧರಸಿ, ಅಲಂಕರಿಸಿದ ನೀ " ಆಧುನಿಕ ನಾರಿ " ಕೇಳಿದರೆ ದುಡಿಯುವ ಮಹಿಳಾ ಮಣಿ ಎನ್ನುವೆ !!

Wednesday, November 13, 2013

ಗಂಡಸರಿಗೇಕೆ " ಗೌರಿ " ದುಖಃ ?!!

ರ್ರೀ..... ಪ್ರಭುಗಳೇ, ಗಂಟೆ ಹತ್ತಾಯ್ತು
ಊಟ ಹೊಟ್ಟೆಗೆ ಬಿದ್ದರೆ ಸಾಕು, 
ಆಕಳಿಸಿ ನಿದ್ದೆ ಎಂದು, ಸುಮ್ಮನೆ ಮಲಗದೆ
ಎಂತಾದ್ರಿ ಅಂತರ್ಜಾಲದಲ್ಲಿ ನೋಟ;
ಮಾಡುವುದಿದ್ದರೆ ಇಲ್ಲಿ ಬಂದು ಮಾಡಿ
ಆಗ ಗೊತ್ತಾಗುತ್ತೆ ನಿಮ್ಮ ಶೌರ್ಯ, ಪ್ರತಾಪ !
ನಾಳೆಗೆ ತರಕಾರಿ ಹಚ್ಚಿಡುವುದೋ
ಅಥವಾ ಪಾತ್ರೆಗಳ ತೊಳದಿಡುವುದೋ
ಮಕ್ಕಳ ಬಟ್ಟೆಗಳ ಇಸ್ತ್ರೀ ಮಾಡಿಟ್ಟರೆ
ನನಗೂ ಒಂಚೂರು ಆರಾಮವಾದೀತು
ನಾನೊಬ್ಬಳೇ ಎಷ್ಟೂಂತ ಮಾಡಲಿ ಹೇಳಿ
ಈ ಮಕ್ಕಳ ಗಮನಿಸಿ, ಮನೆಗೆಲಸ ಮಾಡಿ
ಸಾಲದಕ್ಕೆ ನಿಮ್ಮ ಬೇಕು ಬೇಡಗಳ ಪೂರೈಸಿ
ನಿದ್ರೆಗೆ ಜಾರಿದರೆ ನಿಮ್ಮ ಬಾಹು ಬಂಧನ ಬೇರೆ !
ನೋಡಿ, ನನಗೂ ನಿಮ್ಮ ಜೊತೆ
ಏಗೀ ಏಗಿ ಸಾಕಾಯ್ತು;
ನಾಳೆಯಿಂದ ಆ ರೂಮಿನಲ್ಲಿ
ನೀವೊಬ್ಬರೇ ಬೇರೆ ಮಲಗಿ
ನಾ ಮಕ್ಕಳ ಜೊತೆ ಮಲಗುವೆ
ನಿಮಗಿಷ್ಟ ಬಂದಂತೆ ರಾತ್ರಿಯಿಡೀ
ಕವನ, ಕತೆಗಳ ಬರೆದು
ಅಂತರ್ಜಾಲದಲ್ಲಿ ಪ್ರಕಟಿಸಿ;
ಎಲ್ಲರಿಂದ ಮೆಚ್ಚುಗೆಯ ಪಡೆಯಿರಿ !!
ಲೆ ಲೇ.......... ಭಾಮಾ.....,
ನೀನೇ ಹೀಗೆಲ್ಲಾ ಮಾತಾಡುವುದು
ಯಾವ ಕ್ಷಣದಲ್ಲಿ ಬದಲಾಗುವಿಯೋ,
ಆ ಬ್ರಹ್ಮನಿಗೂ ಗೊತ್ತಿರಲಾರದು ನೋಡು
ನಾ ಎಂದಾದರೂ ಏನೂ ಮಾಡದೆ
ಹಾಗೆಯೇ ಸುಮ್ಮನೆ ತಿಂದಿರುವೆನೇ;
ನೀನೇ ಹೇಳುವೆಯಲ್ಲೇ ಮಾತು ಮಾತಿಗೂ
ದುಡಿದು ಸುಸ್ತಾಗಿರುವಿರಿ ಕಾಫಿ ಕುಡಿದು
ಸುಧಾರಿಸಿಕೊಳ್ಳಿ , ಬೇಗ ಅಡುಗೆ ಮಾಡುವೆ
ಹತ್ತಿರ ಬರಬೇಡಿ, ಬಂದರೆ ನಿಮ್ಮಿಂದ ತೊಂದರೆ
ನೀವು ಬೆಂಕಿ, ನಾನು ಬೆಣ್ಣೆ ದೂರ ಇರಿ; ಕರಗಿದರೆ ಕೆಲಸವೂ ಹಾಳು, ನಿಮಗೇಕೆ " ಗೌರಿ " ದುಖಃ !!

Monday, November 11, 2013

ಕಾಗೆಗಳು ನಾವ ನೀವ ???

ನಮ್ಮದೆಲ್ಲಾ ಒಂದೇ ಜಾತಿ, ಬಣ್ಣ
ನಿಮ್ಮಂತೇ ಜಾತಿ ಧರ್ಮಗಳಿಲ್ಲ
ಮಧ-ಮತ್ಸರ, ಸ್ವಜನ ಪಕ್ಷಪಾತ
ಮೋಸ ಕಪಟಗಳ ಅರಿವಿಲ್ಲವೇ ಇಲ್ಲ
ಮತ್ತೊಬ್ಬರ ಏಳಿಗೆಯ ಕಂಡು ಸಹಿಸದೆ ಕಾಲೆಳೆಯುವರೂ ಅಲ್ಲ;
ಎಲ್ಲೋ ಕದ್ದು, ಮುಚ್ಚಿಟ್ಟು
ತನ್ನದೆಂದು ತಿಂದರೆ
ನಮ್ಮವರೇ ಹೊರ ಹಾಕುವರು,
ಮತ್ತೆಂದೂ ಬಳಗಕ್ಕೆ ಸೇರಿಸಿ ಕೊಳ್ಳರು
ಇರುವಾಗ ಹಂಚಿ, ಇಲ್ಲದಾಗ
ಕರೆ ಕರೆದು ತಿನ್ನುವ
ನಾವೇ ನಿಮಗಿಂತ ಮೇಲು
ನೋಡಿ ನಮ್ಮಂತೆ
ನಿಮಗೆ ಕಪ್ಪನೆ ಬಣ್ಣವಿದೆಯೇ,
ರೂಪವಿದೆಯೆ
ಎಲ್ಲಿ ಎಂಜಲ ಕೈಯಲ್ಲಿನ
ಅನ್ನದ ಅಗುಳು ಬೀಳುವುದೋ
ಎಂದು ಹಾಗೆಯೇ ತಿನ್ನುವಿರಿ
ಕಾಗೆಗಳು ನಾವ ನೀವ ?????

Sunday, November 10, 2013

" ಜಿಪುಣಾಗ್ರೇಸ "

ಓ ಹೋ...ಬರಬೇಕು ಬರಬೇಕು
ಈ ಬಡವನ ಮನೆಗೆ ಮಹಾಲಕ್ಷ್ಮೀ
ಬಂದಂಗಾಯ್ತು ನೀವು ಬಂದದ್ದು
ಆರೋಗ್ಯವೆ, ಕುಶಲವೇ ! 
ಮನೆಯವರೆಲ್ಲರೂ ಸೌಖ್ಯವೆ ಬಾವ !
ಈ ಹೂವು ಹಣ್ಣು, ಸಿಹಿ ಇದೆಲ್ಲಾ ಬೇಕಿತ್ತೆ;
ಹೆ ಹೇ... ನಿಮ್ಮ ತಂಗಿಯ ಮೇಲಿನ ಪ್ರೀತಿಗೆ
ನಾ ಬೇಡ ಎನ್ನಲಾದೀತೆ ಇಲ್ಲಿ ಕೊಡಿ ಬಾವ
ನಿಮಗೇಕೆ ಬೇಸರ, ಕೈಗಳಿಗೂ ಭಾರ;
ಬರುವ ಮುಂಚೆ ಫೋನಾಯಿಸಿದ್ದರೆ ಸಾಕಿತ್ತು
ನಾನೇ ಎಲ್ಲಾ ವಿಷಯವ ತಿಳಿಸುತ್ತಿದ್ದೆ
ಈ ಬಿರು ಬಿಸಿಲಲ್ಲಿ ಮನೆಗೆ ಬರಬೇಕಿತ್ತೆ;
ಅವಳೂ ಇಲ್ಲ, ಇಂದು ಅಡುಗೆಯೂ ಇಲ್ಲ
ಕಾರ್ತಿಕ ಸೋಮವಾರ ವ್ರತ, ಉಪವಾಸ
ಸುಮ್ಮನೆ ಬಂದ ದಾರಿಗೆ ಸುಂಕವಿಲ್ಲ ಅಷ್ಟೆ;
ಬನ್ನಿ ಸುತ್ತಾಡಿ, ಆ ದೇವರ ದರ್ಶನ ಮಾಡಿ
ದೇವಸ್ಥಾನದಿ ತೀರ್ಥ ಪ್ರಸಾದ ಸ್ವೀಕರಿಸಿ
ಹಾಗೆಯೇ ನೀವು ಊರಿಗೆ ಹೋಗುವಿರಂತೆ !  

Thursday, November 7, 2013

ಅಕ್ಕಾ ನಿನ್ ಮಗಳು ನಂಗೆ ಚಿಕ್ಕೊಳಾಗಲ್ವಾ !

ಮುದ್ದಿನ ಮೊಮ್ಮಗಳೆಂದರೆ ಸಾಕು
ಈ ನನ್ನ ಅಪ್ಪಾ ಅಮ್ಮನಿಗೆ ಏಕೋ
ಎಲ್ಲಿಲ್ಲದ ಮಮಕಾರ, ಅಕ್ಕರಾವಸ್ಥೆ
ನನಗಿಂತ ಏಳೆಂಟು ವರ್ಷ ಚಿಕ್ಕವಳು
ಬೇರೆ ಕಡೆ ಒಳ್ಳೆಯ ಹುಡುಗನ ಹುಡುಕಿ
ಮದುವೆಯ ಮಾಡಿ ಕೊಟ್ಟರಾಯಿತು
ನನಗಂತೂ ಈ ಸಂಬಂಧದಲ್ಲಿ ಬೇಡ ! 

ಅಮ್ಮಾ, ಅಕ್ಕ ಬಿಡದೆ ಅತ್ತೂ ಕರೆದು
ಮೂರು ದಿನ ಊಟ ಮಾಡದೆ ಒಪ್ಪಿಸಿ
ನನಗಿವಳ ಗಂಟಾಕಿ ತಪ್ಪು ಮಾಡಿದ್ದರು
ಇಂದು ಹೇಳಿದಕ್ಕೆ ಕೇಳಿದಕ್ಕೆಲ್ಲಾ ಹಲ್ಕಚ್ಚಿ
ಇವಳ ತಾಳಕ್ಕೆ ನಾ ಕುಣಿಯುವಂತಾಗಿದೆ !

ನಾ ಇವಳ ಮದುವೆಯಾದ ಹೊಸತರಲ್ಲಿ
ಮೊದ ಮೊದಲು ಎಲ್ಲವೂ ಚೆನ್ನಾಗಿತ್ತು
ನಗರದಲ್ಲಿ ಕೆಲಸ, ಹೊಸ ಬಾಡಿಗೆ ಮನೆ
ಸಮಯಕ್ಕೆ ಸರಿಯಾಗಿ ಅಮ್ಮನ ಕೈಯಡುಗೆ
ಬೆಚ್ಚಗೆ ತಿಂದುಂಡು ಸ್ವರ್ಗಕ್ಕೆ ಕಿಚ್ಚು ಹಚ್ಚಿದ್ದೆವು !

ನಮಗೂ ಮತ್ತಷ್ಟು ಏಕಾಂತ ಬೇಕಿತ್ತೆನ್ನಿ
ಎಲ್ಲದಕ್ಕೂ ಅಜ್ಜಿಯ ಸೀರೆಯ ಸೆರೆಗಿಡಿದು
ಸುತ್ತುವವಳ ನಾ ಹಿಂಬಾಲಿಸಲಾದೀತೆ
ನನ್ನ ಮನದ ಸೂಕ್ಷ್ಮ ಅರಿತರೇನೋ ಅಮ್ಮ
ನಿಮ್ಮಿಬ್ಬರ ಮಧ್ಯೆ ನಾವೇಕೋ ಮನೋಹರ
ನಾಳೆಯೇ ನಮ್ಮನ್ನು ಊರಿಗೆ ಬಸ್ ಹತ್ತಿಸು !

ಮನು, ಅವಳು ನಿನಗಿಂತ ಚಿಕ್ಕವಳು
ಏನೂ ತಿಳಿಯದ ಮಗ್ಧ ಹಳ್ಳೀ ಹುಡುಗಿ
ನೀನೇ ಅನುಸರಿಸಿ ಕೊಂಡು ಹೋಗು
ಇದೇನು ಕಲಿಯಲಾಗದ ಬ್ರಹ್ಮ ವಿಧ್ಯೆಯೆ
ಮುಂದೆ ಒಂದೊಂದೇ ಎಲ್ಲಾ ಕಲಿತಾಳು
ಅಪ್ಪಾ ಅಮ್ಮನಿಂದ ಬಿಟ್ಟಿ ಸಲಹೆ ಬೇರೆ

ಅಲ್ಲಾ..... ನಾನಿವಳ ಬೈಯುವಂತಿಲ್ಲ
ಏನೂ ಹೇಳುವಂತಿಲ್ಲ ರೇಗುವಂತಿಲ್ಲ
ಹೇಗಿದೆ ನೋಡಿ ಮೊಮ್ಮಗಳಿಗೆ ಬೆಂಬಲ
ನಿನ್ನ ಮೊಮ್ಮಗಳಿಗೆ ನೆಟ್ಟಗೆ ಒಂದೊಪ್ಪತ್ತು
ಒಂದು ಅನ್ನ ಸಾರು ಪಲ್ಯ ಮಾಡಲು ಬರದು
ಹೀಗೇ ಮುಂದುವರೆದರೆ ಸಂಸಾರ ಮಾಡಿದಂತೆ
ನನಗೂ ಹೋಟೆಲ್ ಊಟ ತಿಂದು ಸಾಕಾಗಿದೆ ಯಾರಾದರೊಬ್ಬರು ಊರಿಂದ ಬನ್ನಿ ಅಡುಗೆಕಲಿಸಿ !

ಎರಡನೆಯ ಮದುವೆ

ನಿನ್ನ ಅಪ್ಪ ಅಮ್ಮನ್ನ,
ಕೇಳಿದೆಯೇನೆ ಅಮ್ಮು
ಹೇಗೂ ಮುಂದೆಂದೂ
ನಿನಗೆ ಮಕ್ಕಳಾಗುವುದಿಲ್ಲ
ನಿನ್ನ ಗರ್ಭಕೋಶ ಹಾಳಾಗದಿದ್ದರೆ
ನನಗೆ ಇನ್ನೊಂದು ಮದುವೆ ಬೇಕಾಗಿತ್ತೆ !

ಉಳಿದಿರುವ ನಿನ್ನ ಒಬ್ಬಳೇ ತಂಗಿಯ
ಬೇರೆಲ್ಲೋ ಕೊಟ್ಟು ಕಳಿಸುವುದಕ್ಕಿಂತ
ನನಗೆ ಮದುವೆಯ ಮಾಡಿಕೊಟ್ಟರೆ
ನೀನೂ ಸುಖಿ, ಅವಳೂ ಪರಮಸುಖಿ !

ನಾ ಬೇರೆ ಯಾರನ್ನೋ ಮದುವೆಯಾಗಿ
ನಿನ್ನ ಜಾಗಕ್ಕೆ ಮನೆ ತುಂಬಿಸಿ ಕೊಂಡು
ದಿನ ನಿತ್ಯ ಸವತಿಯ ಜೊತೆ ಗುದ್ದಾಡುವುದಕ್ಕಿಂತ
ನಿನ್ನ ತಂಗಿಯ ಜೊತೆ ಹಾಯಾಗಿ ಇರಬಹುದಲ್ಲ !

ಇಲ್ಲೇನು ನಮಗೆ ದಟ್ಟ ದಾರಿದ್ರ್ಯ ಬಂದಿದೆಯೇ
ಹತ್ತು ತಲೆಮಾರು ತಿಂದರೂ ಕರಗದಷ್ಟು ಆಸ್ತಿ
ಇಷ್ಟೆಲ್ಲಾ ಆಸ್ತಿ- ಪಾಸ್ತಿ ಇರುವಾಗ ನಮಗೆ; ಮಕ್ಕಳಿಲ್ಲದಿದ್ದರೆ ಮನೆಗೆ ಶೋಭೆಯೇನೆ ?
ನಾ ಹೇಳಿಯಾಗಿದೆ ಇಷ್ಟರ ಮೇಲೆ ನಿನ್ನಿಷ್ಟ !

ರ್ರೀ.......... ನಿಮ್ಮನ್ನ, ಅವಳು ಒಪ್ಪ ಬೇಕಲ್ಲ
ಆ ವಿಷಯ ನಂಗೆ ಬಿಡು, ನೀ ಅಳುವೆಯೋ
ಇಲ್ಲಾ ಕಾಲಿಡಿವೆಯೋ ನಿನ್ನ ಅಪ್ಪಅಮ್ಮನ ಒಪ್ಪಿಸು
ಈ ಆಸ್ತಿಗೆ ಬೇರೆಯವರು ಒಡೆಯರಾಗದಿದ್ದರೆ
ನನಗಷ್ಟೇ ಸಾಕು,ಇದಕ್ಕಿಂತ ನಿನಗಿನ್ನೇನು ಬೇಕು !

Wednesday, November 6, 2013

" ಸಮಯ ಪ್ರಜ್ಞೆ "

ಅಯ್ಯೋ... ನಿಮ್ಮ ಮುಖಾ ಮುಚ್ಚಾ...
ನಾನೇ ಬೇಕಿತ್ತೇನ್ರೋ... ನಿಮಗೆ
ಯಾವೋಳು ಸಿಕ್ಕಲಿಲ್ವೇ ನಿಮ್ಮ ಮುಸುಡಿಗೆ
ಏಯ್ ಬಿಡ್ರೋ... ನನ್ನ ಕೈ ಬಿಡ್ರೋ..
ಬಾಯಿ ಮುಚ್ಚಿದ್ರೆ ಕಚ್ಚಿಬಿಡ್ತೀನಿ ನೋಡ್ರಿ
ಮೊದಲೇ ನೀವು ನನ್ನನ್ನ ಕರೆದಿದ್ದರೆ
ನಾನೇ ನಿಮ್ಮ ಹಿಂದೆ ಕರೆದಲ್ಲಿಗೆ ಬರ್ತಿದ್ದೆ
ಇಷ್ಟೆಲ್ಲಾ ಹೊತ್ಕೊಂಡು ಕಷ್ಟ ಪಡಬೇಕಿತ್ತೆ;

ದುಡ್ಡು ಎಷ್ಟ್ ಇಟ್ಟಿದ್ದೀರ ಸಾವಿರ, ಐನೂರು
ಇಲ್ವಾ.., ನಿಮ್ ಮುಖ ನೋಡಿದ್ರೆ ತಿಳಿಯುತ್ತೆ
ದುಡ್ಡಿಲ್ಲದ ದರಿದ್ರದ ಮುಂಡೇವು ನೀವು ಅಂತ
ಹೋಗ್ಲೀ...., ನಾನೇ ಎಲ್ಲಾ ನಿಮಗೆ ಕೊಡ್ತೀನಿ
ಬಿಟ್ಟಿ ದುಡ್ಡು, ಜೊತೆಗೆ ಏಡ್ಸ್ ರೋಗ ಬನ್ರೋ
ಲೇ ಲಂಬೂ...., ಡುಮ್ಮಾ, ಚೋಟು ಸಣಕಲ
ಯಾರ್ ಮೊದಲು ನನ್ನ ಹತ್ತಿರ ಬರ್ತೀರೋ
ನೀನೋ ಇಲ್ಲಾ, ಅವನೋ ಬೇಗ ಬನ್ರೋ...

ಬಾರೋ ನನ್ನ ಮುದ್ದಿನ ರಾಜಕುಮಾರ
ನನ್ನ ಕೈ ನೀ ಇಡುಕೊಳ್ಳುವಾಗ್ಲೇ ನಿಂಗೆ
ಮೃತ್ಯುವಿನ ಸಿಹಿ ಮುತ್ತು ಕೊಟ್ಟದ್ದೆ
ಕೈಯಿ, ಮೈಯಿ ಹೇಗೆ ಪರ ಪರಾಂತ
ಕೆರಕೊಳ್ಳತ್ತಾವನೆ ನೀವೇ ನೋಡ್ರಿ

ಇನ್ನೊಂದರ್ಧ ಗಂಟೇಲಿ ಸಾಯ್ಬಹುದು
ನೀವು ಸುಖ ಕಾಣಬಹುದು ಬನ್ರೋ.. ಅಣ್ಣಾ
ಏಯ್..... ಏನ್ ಮುಖ ಮುಖ ನೋಡ್ತೀರ
ಯಾಕ್ರೋ ಹೆದರಿ ಬೆದರಿ ಓಡೋಗ್ತೀರ ಬನ್ರೋ.... ಥ್ಯಾಂಕ್ಯೂ ಥ್ಯಾಂಕ್ಯೂ" ಪೆಪ್ಪರ್ ರಿಂಗ್ "

Sunday, November 3, 2013

" ಇರಳುಗಣ್ಣು "

ರ್ರೀ...ತಾರಾ.., ಅಂತೂ..ಸಿಕ್ಕಿದರಲ್ಲ
ಏನೋ..ನೀವು ನನ್ನ ಪರಿಚಯಸ್ತರು
ಮೇಲಾಗಿ ತುಂಬಾ... ಬೇಕಾದವರು
ನಿಮಗೊಂದು ವಿಷಯ ಹೇಳ್ಲೇ ಬೇಕ್ರೀ
ಇಷ್ಟೊತ್ತಿಗೆ ಬೇರೆಯವರು ಆಗಿದ್ದಿದ್ದರೆ
ನಿಮ್ಮ ಮನೆ, ಮಾನ ಮರ್ಯಾದೆ ಎಲ್ಲಾ
ಮೂರು ಕಾಸಿಗೆ ಹರಾಜ್ ಹಾಕತಿದ್ದರು

ನೀವಾದರೂ ಏನ್ ಮಾಡಕ್ಕಾಗುತ್ತೆ ಹೇಳಿ
ಅದೇನು ಹೆಂಗಸರ ಕಂಡೇ ಇಲ್ಲದವರ ತರ
ನಿಮ್ಮ ಮನೆಯವರು ಸಂಜೆಯಾದರೆ ಸಾಕು
ಒಂದೇ ಸಮ ಕಣ್ಣ ಕಣ್ಣ ಬಿಟ್ಕೊಂಡ್ ನೋಡ್ತಾರೆ
ಏನೋ ಉಪ್ಪು ಖಾರ, ಹುಳಿ ತಿನ್ನೋ ದೇಹ
ಇದ್ದದ್ದೇ ಈ ಗಂಡಸರಿಗೆ ನೋಡೋ ಚಪಲ
ನೀವಾದ್ರೂ ರಾತ್ರಿ ಹೊತ್ತು ನಿಮ್ ಮನೆಯರಿಗೆ ಒತ್ತಾಸೆಯಾಗಿ ಅವರಿಚ್ಚೆಯಂತೆ ಇರಬಾರದೇ

ಅಯ್ಯೋ.... ಏನ್ ಹೇಳ್ಲಿರ್ರಿ ನನ್ನ ಪ್ರಾರಬ್ದ ಕರ್ಮ ಬಂಗಾರದಂತ ಹುಡುಗ, ಅತ್ತೆ ಮಾವ, ನಾದಿನಿ
ಯಾರೂ ಇಲ್ಲ, ಬೇಕಾದಷ್ಟು ಕರಗದ ಆಸ್ತಿಯಿದೆ ವರದಕ್ಷಿಣೆ ವರೋಪಚಾರ ಇಲ್ಲಾಂತ ನಮ್ಮಪ್ಪ
ನಾನು ಬೇಡ್ಬೇಡ್ಡಾಂದರೂ ಮದುವೆ ಮಾಡಿಸಿದ್ರು

ಈಗ ನೋಡಿ ನಾ ತಲೆ ಎತ್ಕೊಂಡು ತಿರಗಲಾರೆ ಅಳೀಮಯ್ಯನ ಕುರುಡು ಫಸ್ಟ್ ನೈಟಲ್ಲಿ ನೋಡು ಅಂದರಂತೆ ಯಾರೋ ಹಂಗಾಯ್ತು ನನ್ನ ಬಾಳು

" ಎಣ್ಣೆ "

ರ್ರೀ.............., ಎದ್ದೇಳ್ರಿ ಸಾಕು
ಏನ್ ನಿದ್ದೆ ಮಾಡ್ತೀರೋ ಏನೋ
ವರ್ಷಕ್ಕೊಂದು ದೀಪಾವಳಿ ಹಬ್ಬ;
ಏನ್ ಸಡಗರ ಸಂಭ್ರಮ ಇಂದು
ಗಂಟೆ ಹತ್ತಾದ್ರೂ ಇನ್ನೂ ಬಿದ್ಕೊಂಡಿದ್ದೀರಿ
ಎಣ್ಣೆ ಸ್ನಾನ ಮಾಡುವಿರಂತೆ ಬೇಗ ಏಳ್ರಿ !

ಎಣ್ಣೆ ಹೊಟ್ಟೆಗೋ ಇಲ್ಲಾ ತಲೆಗೋ...
ನಿದ್ದೆಗಣ್ಣಲ್ಲೇ ನನ್ನವಳ ನಾ ಕೇಳಿದ್ದೆ
ಆಹಾ.... ಎಣ್ಣೆಯಂತೆ ಎಣ್ಣೆ, ಯಾವ ಬ್ರಾಂಡೊ? ಸ್ವಾಮಿಗಳು ಕುಡಿಯೋದ್ ಬೇರೆ ಕಲಿತಿದ್ದೀರೋ!
ಏಳ್ರಿ ಮೇಲೆ, ಇವತ್ ಕಾದಿದೆ ನಿಮಗೆ ಹಬ್ಬ;
ಬೇಡ ಬೇಡಾಂದ್ರೂ ಕುಡಿಸ್ತೀನಿ ಹರಳೆಣ್ಣೆ
ಸಂಜೆವರೆಗೂ ಟಾಯ್ಲೇಟಲ್ಲೇ ಇರಬೇಕು
ನಗುತ ತಲೆಗೆ ಮೊಟಕಿದ್ದಳು ನನ್ನವಳು !!

Saturday, November 2, 2013

ಹೃದಯ ಹಾಡಿತು

ರ್ರಿ..., ಹೇಳ್ರಿ ಮೇಲೆ
ಕಿವಿ ಕೇಳಸಲ್ವೆ ನಿಮ್ಗೆ,
ಏನ್ ಗಂಡಸರೋ ಏನೋ
ಲೇಡೀಸ್ ಸೀಟಲ್ಲಿ ಕೂರೋದೆ
ನಾಚ್ಕೆ ಹಾಗ್ಬೇಕ್ ನಿಮ್ ಜನ್ಮಕ್ಕೆ;
ವಯಸ್ಸಾದವರಾದ್ರೆ ಪರವಾಗಿಲ್ಲ
ಅದು ನಿಮ್ಮಂತೋರ್ ಕೂತ್ಕೊಳ್ಳೋದೆ
ಹಿಗ್ಗಾ-ಮುಗ್ಗ ಬೈದವಳ ಜನರೇ
ಅಯ್ಯೋ ... ಹೋಗ್ಲಿ ಬಿಡಮ್ಮ ನೀನು,
ಏನೋ ಕಾಲಾಗಲಂತ ಕೂತ್ಕೊಂಡ್ರು
ಕಾಲು ಸರಿಯಿದ್ದಿದ್ದರೆ ನಾವ್ ಬಿಡತ್ತಿದ್ದವೇ

ನನಗೂ ಕೇಳಿ ಮನಸ್ಸಿಗೆ ನೋವಾಗಿ
ಸೇಪ್ಟಿ ಸ್ಟಿಕ್ ಹಿಡಿದು ಕಷ್ಟಪಟ್ಟು ಎದ್ದಿದ್ದೆ;
ದಯವಿಟ್ಟು ಕ್ಷಮಿಸಿ ಮೇಡಂ,
ನಿಲ್ಲಲಾಗದೆ ಈ ರಶ್ ನಲ್ಲಿ ಕೂತೆನೇ ವಿನಃ
ಬೇರೇನೂ ಅಲ್ಲ ಬನ್ನಿ ನೀವೇ ಕುಳಿತು ಕೊಳ್ಳಿ 

ಅರೇ...... ವಿಶ್ವಾಸ್ ಸರ್ ನೀವೇ....,
ಸಾರಿ ಸರ್; ಎಕ್ಸಟ್ರೀಮ್ಲಿ ವೆರಿ ಸಾರಿ
ಈ ನಿಮ್ಮೆಲ್ಲಾ ಕಷ್ಟಕ್ಕೆ ನಾನೇ ಕಾರಣ,
ಕಾಲೇಜ್ ಕ್ಯಾಂಪಾಸಿನಲಿ ಅಂದು
ನಾ ಸ್ಕೂಟಿಯಿಂದ ಗುದ್ದಿದ್ದರ ಪರಿಣಾಮ
ನನ್ನಿಂದಾಗಿ ನಿಮಗೆ ಈ ಸ್ಥಿತಿ ಬಂತು !

Friday, November 1, 2013

" ಅನ್ನಪೂರ್ಣೇಶ್ವರಿ ದೇವಿ "

ಹೇ...ಮನೂ..., ಬಾರೋ.... ಇಲ್ಲಿ
ಏನು ಆಗಲೇ ಶುರುವಾಯಿತೋ
ಮುಸಿ ಮುಸಿ ನಗು, ಪಿಸು ಮಾತು
ಆ ಭಿನ್ನಾಣಗಿತ್ತಿ ಹೇಳಿದ್ದಕ್ಕೆಲ್ಲ
ಕೇಳಿದ್ದಕ್ಕೆಲಾ ನೀ ಏನಾದರು
ಕೋಲೆ ಬಸವನ ರೀತಿ ತಲೆಯಾಡಿಸಿ,
ನಿನ್ನ ಜುಟ್ಟು ಅವಳ ಕೈಲಿಟ್ಟು
ಅವಳ ಹಿಂದೆ ಮುಂದೆ ಸುತ್ತಿ
ಹೆಂಡತಿಯೆಂದು ತಲೆ ಮೇಲೆ ಹೊತ್ತರೆ,
ಅವಳ ತಾಳಕ್ಕೆ ನೀ ಕುಣೀ ಬೇಕಾದೀತು
ಗಂಡಸೆಂಬ ಗಂಭೀರತೆಯ
ನೀ ಈಗಲಿಂದಲೇ ಬೆಳೆಸಿಕೋ
ಅವಳಿಗೆ ಸಲುಗೆ ಕೊಟ್ಟೆಯೋ ನೀ ಕೆಟ್ಟೆ
ಹೆತ್ತು ಹೊತ್ತು ತುತ್ತಿಟ್ಟವಳ ಮರೆತು,
ಮುತ್ತಿಟ್ಟವಳ ಮೆರೆಸೀಯ
ಇದೇ ನನ್ನ ಕಿವಿ ಮಾತು,
ಆಶೀರ್ವಾದವೆಂದು ತಿಳಿಯೋ
ಅಮ್ಮಾ...., ನನ್ನ ಮುದ್ದು ಅಮ್ಮಾ.....
ತಾಳಿ ಕಟ್ಟಿ ಇನ್ನೂ ಅರ್ಧ ಗಂಟೆ ಕಳೆದಿಲ್ಲ,
ಆಗಲೇ ಶುರುವಾಯಿತೆ ನಿನ್ನ ಬುದ್ಧಿ ಮಾತು ನಿನಗೇಕಮ್ಮ ಇಲ್ಲದ ಯೋಚನೆ ಆಲೋಚನೆ
ನಾ ಅಂತವನೆ, ನಿನ್ನ ಮಾತ ನಾ ಮೀರುವನೆ ಯಾರಿಗಿದೆಯಮ್ಮ ನಮ್ಮ ಮನೆಯಲ್ಲಿ ಧೈರ್ಯ
ಚಿಕ್ಕಪ್ಪ- ಚಿಕ್ಕಮ್ಮ, ಅಣ್ಣ- ಅತ್ತಿಗೆ, ಇನ್ನು ಅಪ್ಪ
ನಿನ್ನ ಎದಿರು ನಿಂತು ಮಾತಾಡುವ ಶಕ್ತಿ ಇದೆಯೇ ಅಜ್ಜಿಯೊಬ್ಬರೇ ತೊಡೆತಟ್ಟಿ ನಿಲ್ಲುವುದು ನಿನ್ನೆದಿರು
ಪಾಪ ಕಣೋ........ ನಿಮ್ಮ ಅಪ್ಪ.....,
ನಾ ಹಾಕಿದ ಗೆರೆಯ ಎಂದೂ ದಾಟಿಲ್ಲ
ಎಲ್ಲದಕ್ಕೂ ಸೈ ಎನ್ನವ ದೇವರವರು
ಇನ್ನು ಆ ನಿನ್ನ ಚಿಕ್ಕಪ್ಪ, ಮೈದುನಲ್ಲ ನನ್ನ ಮಗ;
ನಿನ್ನ ಚಿಕ್ಕಮ್ಮ, ಅಣ್ಣ - ಅತ್ತಿಗೆ ತುಟಿ ಪಿಟಕ್ಕೆನ್ನರು
ಈ " ಅನ್ನಪೂರ್ಣೇಶ್ವರಿ ದೇವಿ " ಎಂದರೆ
ಶ್ರೀಮಂತಿಕೆಗೆ ಮತ್ತೊಂದು ಹೆಸರು
ನನ್ನ ಘನತೆ ಗತ್ತು; ಹತ್ತೂರಿಗೂ ಗೊತ್ತು, !!

Thursday, October 31, 2013

" ಫಜೀತಿ "

  ಒಂದೇ ಉಸಿರಿಗೆ " ಸಾ... ಸಾ..." ಎಂದು ಕೂಗಿ ಕೊಳ್ಳುತ್ತ ಬಂದವನ, " ಏನ್ಲಾ ಗೊಣ್ಣೆ ಸೀನ......., ಯೇನ್ಲಾ ಆಯ್ತು, ಹಿಂಗ್ಯಾಕ್ಲಾ ಓಡೋಡಿ ಬಂದೆ, ನಾಯಿ ಯೇನಾರ ಅಟ್ಟಿಸ್ಕೊಂಡ್ ಬಂತೇನ್ಲಾ... ".
" ಸಾ.. ನಿಮ್ಮ ತಾಯಿ ಕರಿತಾವ್ರೆ ಸಾ... " ಎಂದ. "
ಲೆ ಲೇ... ಗೊಣ್ಣೇ..., ನಮ್ಮ ತಾಯಿ ಸತ್ತು ವರ್ಷ ಆಯ್ತು, ನಿಜ ಹೇಳ್ಲಾ ಯಾರೂಂತ ಇಲ್ಲಾಂದ್ರೆ ಈ ಬೆತ್ತ ತೂರಿಸಿ ಬಿಡ್ತಿನಿ ಮಗನೆ" ಕೋಪಗೊಂಡಿದ್ದೆ.

" ಸಾ... ನಮ್ ತಾಯಾಣೆಗೂ ಅವರೇ ಬತ್ತಾವರೆ ನೀವೆ ಬೇಕಾದ್ರೆ ನೋಡ್ಕೊಳ್ಳಿ ಸಾ.... " ಎಂದೇಳಿ ಹೊರಡುವವನ ಲೆ ಲೇ....... ಯಾರೋ ಹೇಳಿದ್ದು ನಮ್ಮ ತಾಯಿ ಅಂತ, ನನ್ನ ಹೆಂಡ್ರು ಕಾಣ್ಲಾ......."
ನನ್ನವಳ ಆಕಾರ ( ಸೈಜ್ ) ನೋಡಿ ನನ್ನ ತಾಯಿ ಅಂತ ಅಂದು ಕೊಂಡಿರ ಬೇಕು.

"ನೋಡ್ಕೊಳ್ಲಾ........... ನಾ ಯಂಗೆ ಡ್ರಿಲ್ ಹೇಳಿ ಕೊಡ್ತಿದ್ದೀನೋ ..... ನೀನು ಅಂಗೆಯ ಇವರಿಗೆಲ್ಲಾ ಹೇಳ್ಕೊಡ್ತಿರು...., ನಾ ಹಿಂಗ್ ಹೋಗಿ ಅಂಗ್ ಬರ್ತೀನಿ"

" ಆಹಾ.... ನೀವೋ..... ನಿಮ್ಮ ಡ್ರಿಲ್ಲೋ.... ನೋಡೋಕೆ ಎರಡೂ........... ಕಣ್ ಸಾಲ್ದು ರ್ರಿ, ಮಕ್ಕಳಿಗೆ ಈಗೇನ, ನೀವ್ ಡ್ರಿಲ್ ಹೇಳ್ಕೊಡೋದು ಅಲ್ಲಾ ನಿಮ್ ಹೆಚ್ಚೆಮ್ಮು...... ನೋಡಿ, ಸುಮ್ಮನಿದ್ರು ಅಂದ್ರೆ, ಡ್ರಿಲ್ ಬಗ್ಗೆ ಅವರಿಗೂ ಗೊತ್ತಿಲ್ಲಾಂತ ಕಾಣುತ್ತೆ.
ಪಾಪ ಆ ಮಕ್ಕಳೋ.... ಗುರುವಿನಂತೆ ಶಿಷ್ಯರು" ನನ್ನವಳು ಬಿದ್ದು ಬಿದ್ದು ನಕ್ಕಿದ್ದಳು.

" ಹೆ ಹೇ... ನಾನು ಅಂದ್ರೆ ಏನೂ, ನನ್ ಡ್ರಿಲ್ ಅಂದ್ರೆ ಏನು ಶಿಸ್ತು ; ನಾ ಶಿಸ್ತಿನ ಮನುಷ್ಯ ಕಾಣೆ, ನಾ ಹೇಳ್ಕೊಟ್ಟಂಗೆ ಮಕ್ಕಳು ಡ್ರಿಲ್ ಮಾಡ್ತಿರ್ಲಿಲ್ವೇ"

" ಹೌದೌದು ಥೂ.... ತೆಗೀರಿ ನಿಮ್ ಕೈಯಿ
ಕೆರೆದೂ ಕೆರೆದೂ ಹುಣ್ಣಾದೀತು, ಆ ಮಕ್ಕಳ ಮುಂದೆ; ನಿಮ್ಮ ಹೆಚ್ಚೆಮ್ ಮುಂದೆ, ಅಸಹ್ಯ ಅನ್ನಿಸಲಿಲ್ವೆ
ದಿನಕ್ಕೆ ಎರಡು ಬಾರಿ ಸ್ನಾನ ಮಾಡ್ತಿರಿ, ತೊಡೆ ಹತ್ತಿರ ಪರ ಪರಾಂತ ಕೆರಕೊಳ್ಳೋದೆ " ಏನಾದ್ರೂ ರೋಗ ಇದ್ದರೆ ಯಾವುದಾದ್ರು ಆಸ್ಪತ್ರೆಗೋಗಿ ತೋರಿಸಿ
ನಿಮ್ಮ ಸಹವಾಸ ದೋಷದಿಂದ ನನಗೂ ನಮ್ಮ ಮಕ್ಕಳಿಗೂ ರೋಗ ಬಂದೀತು ".

" ಲೆ ಲೇ ಇವಳೇ.... ತಾರ, ನನಗ್ಯಾವುದು ರೋಗ ಇಲ್ವೆ ನಿನ್ನಾಣೆಗೂ, ಹಾಳಾದ್ದು ಯಾವ್ದೋ ಇರುವೆ ಬೆಳಿಗ್ಗೆಯಿಂದ ಪ್ಯಾಂಟೊಳಗೆ ಸೇರಿ ಕೊಂಡು ಕಚ್ಚಿ ನನ್ನ ಪ್ರಾಣ ತಿಂತಿದೆ ಕಾಣೆ ". " ನೀ ಇಲ್ಲೇ ನಂಗೆ ಕ್ಲಾಸ್ ತಗೋಬೇಡ ಮಾರಾಯ್ತೀ, ಬೇಗ ಮನೆಗೆ ನಡೆಯೇ, ಸ್ಕೂಲ್ ಹುಡುಗ್ರು ಕೇಳಿಸ್ಕೊಂಡ್ರೆ ಇಡೀ ಊರಿಗೆ ರೇಡಿಯೋ ಹಾಕ್ತಾರೇ......

Tuesday, October 29, 2013

ಇಂದು ನಾ ಎಡ ಮಗ್ಗಲಲ್ಲಿ ಎದ್ದಿದ್ದೆನೆ ?!

ರ್ರೀ..........ಸಾಕು, ಬನ್ರಿ ಒಳಗೆ
ನಿಮಗೆ ಹೇಳ್ತಿರೋದು ಕೇಳ್ಸಿಲಿಲ್ವೇ
ಏನವಳು ಸೀಮೆಗಿಲ್ಲದ ಸುಂದರಿ,
ಹಾಯ್ ಹೇಳ್ದಲೂಂತ ಬಾಯ್ಬಿಡ್ಬೇಡಿ;
ಈ ಗಂಡಸರ ಬುದ್ಧಿನೇ ಹೀಗೆ ಏನೋ
ಜಡೆ ಕಂಡರೆ ಸಾಕು, ಮೈಮರಿತೀರಿ !

ಲೇ..ಲೇ........ಇಷ್ಟೊಂದು ಕೋಪ ಏಕೆ ?
ಏನೋ ಎದಿರು ಮನೆಯವರಂತ ನನ್ನ ನೋಡಿ,
ಅವಳು ಪರಿಚಯದ ನಗೆ ನಕ್ಕಳಷ್ಟೆ
ಇಷ್ಟಕ್ಕೆಲ್ಲಾ ನೀ ನನ್ನ ಅನುಮಾನಿಸೋದೆ;
ಇಲ್ಲಾ ಈಗ ನಿಮ್ಮನ್ನ ಮುದ್ದು ಮಾಡ್ತೀನಿ ಬನ್ನಿ
ಹಾಕ್ರಿ ಬಾಗಿಲು ಎಷ್ಟು ದಿನದಿಂದ ನಡಿತಿದೆ
ನಿಮ್ಮ ಕದ್ದು ಮುಚ್ಚಿ ಮಾಡುವ ವ್ಯವಹಾರ ಹಾಂ !!

ಲೆ ಲೇ...ಇದೇನೆ ಇದು, ನಿನ್ನ ಕೈಲಿ ಪೊ ಪೊರಕೆ
ಪೊರಕೆ ಯಾಕ್ ಹಿಡ್ಕೊಂಡ್ ಬಂದಿಯೇ ನನ್ನ ಹತ್ತಿರ, ಹುಂ ಹೂಂ.. ಬನ್ನಿ ಪೂಜೆಯಿದೆ, ಬೇಗ ಕಸ ಗುಡಿಸಿ; ಎಂದೆನ್ನಬೇಕೆ ನಗು ನಗುತ ನನ್ನ ಮುದ್ದಿನಮಡದಿ!

ಖುಷಿಯೋ ಖುಷಿ ನನ್ನೊಳಗೆ

ಇದೇನ್ರಿ..ಇಷ್ಟೊಂದು
ಖುಷಿಯಲ್ಲಿದ್ದೀರಿ
ನಿಮ್ಮ ಮುಖದಲ್ಲಿ
ನಾನೆಂದೂ ಇಂಥಹ
ಸಂತೋಷವ ಕಂಡಿರಲಿಲ್ಲ
ಪ್ರಮೋಷನ್ ಏನಾದ್ರೂ ಬಂತೆ
ಅಥವಾ ಲಾಟರಿಯಲ್ಲಿ ಬಹುಮಾನ
ಇಲ್ಲವೆ, ಮತ್ತಿನ್ನೇನು ಕತೆ;
ಹೇಳದೆ ಸುಮ್ಮನೆ ನಕ್ಕರೆ ಹೇಗೆ
ಹೋಗಲಿ ಏನೆಂದು ಹೇಳಬಾರದೆ

ಸ್ವಲ್ಪ ತಡಿಯೇ.... ಮಾರಾಯ್ತಿ,
ನಿನಗೆಲ್ಲಾ ನಾ ಹೇಳುವೆ
ಅಷ್ಟೊಂದು ಅವಸರವೆ
ಹೋಗಿ ಸಕ್ಕರೆಯ ಡಬ್ಬ ತರಲೆ
ಬಾಯಿ ಸಿಹಿ ಮಾಡಿಕೊಳ್ಳುವ
ಅದೇನೂ ಬೇಡ ನಾನೇ ತಂದಿರುವೆ
ಬಾಯ್ತೆರೆ ಈ ಮೈಸೂರ್ ಪಾಕ್ ತಿನ್ನು
ಸಿಹಿ ಸುದ್ದಿಯ ಹೇಳದೆ ಸಿಹಿಯೆ
ನಾ ಗಂಡು ಮಗುವಿಗೆ ಅಪ್ಪನಾದೆ

ನಿಮಗೆಲ್ಲೋ ಹುಚ್ಚಿರ ಬೇಕು
ಮಕ್ಕಳಾಗುವುದಿಲ್ಲೆಂದು ಗೊತ್ತಿದ್ದೂ
ನಿಮಗೆ ನನ್ನ ಕಂಡರೆ ಅಪಹಾಸ್ಯವೆ
ಹೌದಲ್ಲವೆ, ಅಯ್ಯೋ.... ದೇವರೇ....
ಖುಷಿಗೆ ಸತ್ಯ ಹೊರ ಬೀಳುವುದಿತ್ತು
ನನಗೆ ಎರಡನೆಯ ಸಂಸಾರ ಇರುವುದು
ಇವಳಿಗೆ ಹೇಗೆ ತಾನೆ ತಿಳಿದೀತು ಪಾಪ !!
ನಾ ಹೇಳಿದರೆ ತಾನೆ ತಕ್ಷಣವೇ ನಗಾಡಿದ್ದೆ
ಅಯ್ಯೋ..... ಪೆದ್ದೀ... .....
ನಿನ್ನ ತಂಗಿಗೆ ಮಗುವಾದರೆ ನಮಗೆ
ಮಕ್ಕಳಾದಂತೆ ಅಲ್ಲವೇನೆ ನೋಡು
ನೀನು ದೊಡ್ಡಮ್ಮ, ನಾ ದೊಡ್ಡಪ್ಪ !

ಊರ್ಮಿಳ


ಇದೇನೆ ಉಮ್ಮಿ....
ಹೀಗೆ ಮುಖ ಊದಿಸಿಕೊಂಡು
ಒಬ್ಬಳೇ ಅಳುತ ಕುಳಿತಿರುವೆ
ಅಮ್ಮ ಏನಾದರು ಅಂದರೆ
ಏನೂ ಅನ್ನಲಿಲ್ಲವೆ
ಮತ್ತೇಕೆ ಈ ಬಿಗುಮಾನ
ಓಹ್ ಶಿಟ್, ಹಾಳಾದ್ದು
ಎಂಥ ಕೆಲಸವಾಯ್ತು ನೋಡು
ಕೆಲಸದ ಗಡಿಬಿಡಿಯಲ್ಲಿ
ನನಗೆ ಮರೆತೇ ಹೋಗಿತ್ತು
ಸಂಜೆ ಶಾಪಿಂಗ್ ಮಾಲ್ ಗೆ
ಕರೆದೊಯ್ಯುವೆ ಎಂದಿದ್ದೆ
ಎಕ್ಸಟ್ರೀಮ್ಲಿ ಸಾರಿ ಕಾಣೆ
ಆದದ್ದಾಯ್ತು ಹೋಗಲಿ ಬಿಡು
ನಾಳೆ ಆಫೀಸಿಗೆ ರಜೆ ಹಾಕಿ
ದಿನವಿಡೀ ನಿನ್ನ ಜೊತೆಗಿರುವೆ
ನೀ ಶಾಪಿಂಗ್ ಮಾಡುವೆಯಂತೆ
ಈಗಲಾದರು ಮೇಲೇಳುವೆಯೋ
ನನಗೆ ತುಂಬಾ ಹಸಿವಾಗುತ್ತಿದೆ

ಅದಕ್ಕೆ ಇರಬೇಕು ಅಮ್ಮಾವರಿಗೆ
ನನ್ನ ಮೇಲೆ ಎಲ್ಲಿಲ್ಲದ ಕೋಪ
ಮೇಕಪ್ ಮಾಡಿ ಕೊಳ್ಳಲು
ಗಂಟೆಗಟ್ಟಲೆ ಕನ್ನಡಿ ಎದಿರು ನಿಂತರೆ
ನನ್ನನ್ನೇ ಮರೆತು ಫೋನಾಯಿಸದೆ
ಈ ಸೀರೆ ಹುಡಲೆ ಆ ಸೀರೆಯೋ ಎಂದು
ಹುಡುಕಾಟದಲ್ಲೇ ಕಾಲ ಕಳೆದಿರಬೇಕು
ಇದ್ದದ್ದು ಒಳ್ಳೆಯದ್ದೇ ಆಯಿತು ಬಿಡು
ಈ ರಾತ್ರಿಗೆ ಈ ಅಲಂಕಾರ ಎಲ್ಲವ
ಮಧು ಮಂಚದಿ ನಾ ಸೂರೆಗೊಳ್ಳುವೆ ॥

Monday, October 28, 2013

ಅಮ್ಮ

ಬಸಿರಾಗದೆ
ನೊಂದ ಬಂಜೆಗೆ,
ಬಾಯ್ತುಂಬ ಕರೆದ
ಭಿಕ್ಷುಕನೊಬ್ಬ;
ಅಮ್ಮಾ ತಾಯೇ ಎಂದು
ಹಸಿವೆಯ ತಾಳಲಾರದೆ
ತಾ ನೊಂದು !

ತಿರುಗು ಬಾಣ

ಈ ನನ್ನೆಲ್ಲಾ ಕಷ್ಟಗಳಿಗೆ
ನೀವೇ ಕಾರಣಕರ್ತರು,
ಮಾಡುವುದೆಲ್ಲಾ ಮಾಡಿ
ಈಗ ನಗುವುದ ನೋಡಿ
ಈ ನನ್ನ ಚೊಚ್ಚಲ ಹೆರಿಗೆಗೆ;
ನಾ ತವರಿಗೆ ಹೊರಟರೆ
ಮತ್ತೇ ಬರುವುದು ವರ್ಷಕ್ಕೆ
ಅಲ್ಲಿಯವರೆಗೂ ಅಡುಗೆಯ
ನೀವೇ ಮಾಡಿ ಕೊಳ್ಳಿ
ಕೈ ಬಾಯಿ ಸುಟ್ಟುಕೊಂಡು
ನನ್ನ ನೆನಪಿಸಿ ಕೊಳ್ಳಿ
ನನ್ನವಳು ಮುಸಿ ಮುಸಿ ನಕ್ಕಿದ್ದಳು ॥

ನಿನ್ನದೇನೂ ತಪ್ಪಿಲ್ಲ ಬಿಡು ಮಾರಾಯ್ತಿ,
ಆದದ್ದೇಲ್ಲಾ ಆಗಿದ್ದು ನನ್ನಿಂದಲೇ ಅಲ್ಲವೆ
ವರ್ಷವೇನು ನೀ ಹೆರುವ ಮಗನಿಗೋ
ಮಗಳಿಗೋ ನಾಮಕರಣವ ಮುಗಿಸಿ
ನಡೆ - ನುಡಿ, ಪಾಠ ಎಲ್ಲವ ಕಲಿಸಿ 
ಅಲ್ಲಿಯೇ ಶಾಲೆಗೆ ಸೇರಿಸಿ, ಇದ್ದು ಬಿಡು
ನನಗೇನೂ ಅವಸರವಿಲ್ಲ, ಅಭ್ಯಂತರವೂ ಇಲ್ಲ
ನೀ ಮತ್ತೇ ಹಿಂತಿರುಗಿ ಬರುವಷ್ಟರಲ್ಲಿ
ನಿನ್ನ ಜಾಗಕ್ಕೆ ಮತ್ತೊಬ್ಬ ಸುಂದರಿಯ
ನಿನ್ನ ಸವತಿಯಾಗಿ ಜೊತೆಗೆ ತಂದಿಟ್ಟು ಕೊಳ್ಳುವೆ ಬೇಕಿದ್ದರೆ ಅವಳ ಜೊತೆ ನೀ ಇರಬಹುದು
ಇಲ್ಲವಾದರೆ ಒಂದಷ್ಟು ಜೀವನಾಂಶವ ಕೊಡುವೆ
ನಗು ನಗುತ ತಿರುಗು ಬಾಣವ ನಾ ಬಿಟ್ಟಿದ್ದೆ ॥

ನೋಡ ಬೇಕಿತ್ತು ನನ್ನವಳ ಪರದಾಟ
ಕೃಷ್ಣೆ - ಕಾವೇರಿ, ತುಂಗ -ಭದ್ರೆಯರು
ಒಮ್ಮೆಲೇ ನನ್ನವಳ ಕಣ್ಣುಗಳಲ್ಲಿ ಪ್ರತ್ಯಕ್ಷ
ನೀವೇಳಿದಂತೆ ಮಾಡುವ ಆಸಾಮಿಯೇ
ಅಯ್ಯೋ ಅಮ್ಮಾ... ತವರಿಗೆ ನಾ ಬರಲಾರೆ
ಬಸಿರು - ಬಾಣಂತಾನವ ಇಲ್ಲಿಯೇ ಆಗಲಿ
ನನಗೆ ಹೆಚ್ಚು ಕಡಿಮೆಯಾದರೆ ಅಲ್ಲೇನು
ಸುಸಜ್ಜಿತ ದೊಡ್ಡ ಆಸ್ಪತ್ರೆ ಇದೆಯೇ
ನೀ ನಿಶ್ಚಿಂತೆಯಿಂದಿರು ನಿನ್ನ ಅಳಿಯಂದಿರೇ
ಖರ್ಚು ವೆಚ್ಚಗಳೆಲ್ಲವ ನೋಡಿಕೊಳ್ಳುವರು ॥