" ಅವಮಾನ "

ಅಪ್ಪಿತಪ್ಪಿ ಬಾಯಿತಪ್ಪಿ
ನಾನೆ ನನ್ನವಳಿಗೆ ಮಗಳ ವಿಷಯವ
ಎಲ್ಲಿ ಹೇಳಿಕೊಳ್ಳುವೆನೋ.... ಎಂಬ ಭಯಕೆ,
ಆತಂಕದಿ ಏನೂ ಮಾಡಲಾಗದ ನನ್ನೀ ಸಂದಿಗ್ದತೆಗೆ
ನೆನೆನೆದು ಅಳುತ ಕುಳಿತಲ್ಲಿಯೇ.... ಒದ್ದಾಡಿದ್ದೆ
ನೀ ಹೊತ್ಹೆತ್ತ ಮಗಳು ಯಾರದೋ ಜೊತೆ
ಕದ್ದು ಮದುವೆಯಾಳೆಂದು ಹೇಗೆ ತಾನೆ ಹೇಳಲಿ?
ಇದ ಕೇಳಿ ಸುಮ್ಮನಿರುವಳೆ ? ಅವಮಾನ ಸಹಿಸುವಳೆ
ಪ್ರಾಣ ಬೇಕಾದರು ಬಿಟ್ಟಾಳು ...
ಆಪ್ತ ಮಿತ್ರ ತಮಾಷೆಗೆ ಹೇಳಿದ್ದಾಗಲಿ ಅಲ್ಲ
ಫೋಟೊ ತೋರಿಸಿ, ಸಂತೈಸಿ ಮನೆಗೆ ಕರೆದೊಯ್ದಿದ್ದ ;
ತಾಳಿಗೆ ಕೊರಳೊಡ್ಡುತ್ತಿರುವ ಮಗಳ ಮುಖ ಕಂಡು
ಎದೆಯೊಳಗೆ ಎದ್ದ ಕೋಲಾಹಲದ ಅಗ್ನಿವರ್ಷಧಾರೆಗೆ
ಎದೆಯೊಡೆದು ನಾ ಇಲ್ಲೇ... ಸಾಯಬಾರದೆ ?
ಈ ಭೂಮಿ ಬಾಯ್ಬಿಟ್ಟು ನುಂಗಬಾರದೆ ?
ಹೊತ್ತು ತುತ್ತಿಟ್ಟವರೂ ಇವಳಿಗೆ ನೆನಪಾಗಲಿಲ್ಲವೆ ?
ಒಬ್ಬಳೇ ... ಮುದ್ದಿನ ಮಗಳೆಂದು ಸಲುಗೆ ಇತ್ತದೇ ತಪ್ಪಾಯ್ತೆ ?
ಗೆಳತಿಯ ಮದುವೆ ಇದೆಯಂದು ನಂಬಿಸಿ ಹೋದವಳು
ಇವಳ ಮದುವೆಗಾಗಿಯೆ ? 
ನೆರೆಹೊರೆಯವರು, ಬಂಧು ಬಳಗ, ಸ್ನೇಹಿತರು
ಕೇಳಿದರೆ ನಾ ಹೇಗೆ ಉತ್ತರಿಸಲಿ ?
ಯಾವ ತಂದೆತಾಯಂದಿರಿಗೂ ಇಂತಹ ಪರಿಸ್ಥಿತಿ ಬರದಿರಲಿ
ಇದ್ದೊಬ್ಬ ಮಗಳು ಸತ್ತಳೆಂದು
ಒಂದಷ್ಟು ದಿನ, ವರ್ಷಗಳ ಕಾಲ
ಅತ್ತು ಗೋಳಾಡುತ ಮರೆಯಬಹುದಿತ್ತು;
ಅವರಿವರು ಬಂಜೆ ಎಂದು ನನ್ನವಳ
ಕನಿಕರಿಸಿ ಹೀಗೆಳೆಯುವಾಗ ಮನ ನೊಂದರೂ
ನಾವಿಷ್ಟೇ..  ಪಡೆದ ಪುಣ್ಯದ ಫಲವೆಂದು
ನಿಟ್ಟುಸಿರಿನ ರಾತ್ರಿಗಳ ದೂಡುತ ಕಳೆಯಬಹುದಿತ್ತು
ಕಂಡಕಂಡ ಗುಡಿಗೋಪುರಗಳ ಸುತ್ತಿ,
ಬೆಟ್ಟ ಗುಡ್ಡಗಳ ಹತ್ತಿ, ವ್ರತನೇಮಾಧಿಗಳಿಂದ
ಕಾಣದ ದೇವರುಗಳಿಗೆ ಹರಕೆ ಹೊತ್ತು
ಸಾವು ಬದುಕಿನ ನಡುವೆ ಹೋರಾಡಿ ಹೆತ್ತ
ನನ್ನವಳ ಕೂಗು ಈಗಲೂ ನನ್ನೊಳಗೆ ಪ್ರತಿಧ್ವನಿ !!

ಇದೆಲ್ಲಾ ನನಗೆ ಬೇಕಿತ್ತೇ...?

ನನ್ನ ಅಪ್ಪ, ಅಮ್ಮ
ನನಗೆ ಏಕಾದರು
ಇಂತಹ ಹೆಸರಿಟ್ಟರೋ... !!
ಅಣ್ಣಯ್ಯ ಎಂದು,
ಇದು ನನಗೆ ಬೇಕಿತ್ತೇ... ??
ಕಿರಿಯರಿಂದಿಡಿದು
ಹಿರಿಯರಾದಿಯಾಗಿ
ನನ್ನ ಹೆಸರಿಡಿದು ಕರೆಯುವಾಗ
ನನಗೋ ಎಲ್ಲಿಲ್ಲದ ಖುಷಿ
ನಾ ಎಷ್ಟೆಲ್ಲಾ ಬೀಗಿದ್ದೆ ;
ಮದುವೆಯ ಮೊದಲ ರಾತ್ರಿಯಲಿ
ನನ್ನವಳು ಹಾಲಿಡಿದು, ಹಲ್ಕಿರಿದು
ಬಳುಕಿ ವಯ್ಯಾರದಿ ಬರುವಾಗ
ನಾ ಏನೇನೋ ಕನಸ ಕಂಡಿದ್ದೆ;
ಹಾಲು ಕುಡಿದು, ಬಾಯಿ ಒರಸಿ
ಹುಸಿ ನಗೆಯ ಬೀರಿದ್ದೆ...
ನಾ ಇಂದು ಪರಮಸುಖಿ ಎಂದು
ನನ್ನವಳು ಮೆಲ್ಲನೆ ಬಳಿ ಬಂದು
ಅಣ್ಣಯ್ಯಾ... ಎಂದು ಉಸಿರಿದಾಗಲೇ...
ಏರಿದ್ದ ಬಿಸಿ ಜರ್ರನೆ ಇಳಿದಿದ್ದು...
ಮೊದಲಿನವಳಾಗಿದ್ದರೆ ಎಷ್ಟೋ ... ಚೆನ್ನಿತ್ತು
ಅಣ್ಣಯ್ಯ ಎಂದು ಕರೆವಾಗಲೆಲ್ಲಾ
ಮೈ ಮನಸ್ಸೆಲ್ಲ ಮುಳ್ಳೆದ್ದು
ಛೇ... ಇವಳ ಜೊತೆ ಸಂಸಾರವೇ?
ಅರಚಾಡಿ, ಕಿರುಚಾಡಿ ತೊರೆದು
ದೊಡ್ಡಮ್ಮನ ಮಗಳ ಮಗಳ
ಬಾಳ ಬೆಳಗಬಹುದೆಂದು
ವರಿಸಿದ್ದು ನನ್ನದೇ ತಪ್ಪು
ಎಲ್ಲವೂ ನನ್ನ ದುರಾದೃಷ್ಟ
ಮೊದಲಿನವಳಾಗಿದ್ದರೆ
ಅಣ್ಣಯ್ಯ ಎಂದು ಕರೆವಾಗಲೆಲ್ಲ
ಕಿವಿಗೆ ಅರಳೆಯನಿಟ್ಟು
ಜೀವನಪೂರ ಸುಖಿಸಬಹುದಿತ್ತು
ಆ ಹಾ....!! ಎರಡನೆಯವಳೋ....
ರ್ರೀ ... ಎನ್ನುವುದಿರಲಿ, ಹೆಸರಿಡಿದು ಕರೆಯದೆ
ಲೋ... ಮಾವಾ... ಕರೆದದ್ದು ಕೇಳಿಸದೆ
ನಿನ್ನ ಕಿವಿಗೇನು ' ಬಾವ '
ಎನ್ನುವಳಲ್ಲಾ .... ನನ್ನನ್ನೇ ..!!

ಮತ್ತೊಂದು ಮದುವೆ ನನಗೆ ಬೇಕೆ ನೀವೇ....ಹೇಳಿ ?

ಎಷ್ಟೋ ನೀರವ ನಿದ್ದೆಗಳಿಲ್ಲದ ಅಹೋ.. ರಾತ್ರಿಗಳು
ನನ್ನವಳ ನೆನಪುಗಳ ನಿಟ್ಟುಸಿರಿನ ಬೇಗೆಯಲ್ಲಿ
ನನ್ನ ಹಣೆಬರಹವನ್ನೆಲ್ಲಾ...  ಹಳಿಯುತ, ಅಳುತ
ನನ್ನೀ... ಅಸಹಾಯಕ ಸ್ಥಿತಿಯನ್ನೆಲ್ಲ
ಯಾರಿಗೆ ತಾನೆ ಮನಬಿಚ್ಚಿ ಹೇಳಿಕೊಳ್ಳಲಿ ?
ನಾ ಹೇಗೆ ತಬ್ಬಲಿಯಾದ ಈ ಕಂದನ ನಿಭಾಯಿಸಲಿ ?
ದಿಕ್ಕೇ.... ತೋಚದೆ ಯೋಚಿಸಿ ಯೋಚಿಸಿ ಸಾಕಾಗಿ
ನನಗಲ್ಲದಿದ್ದರು ಈ ಮುದ್ದು ಕಂದನಿಗಾಗಿ
ನಾ ಮರು ಮದುವೆಯ ಆಗಲೇ.... ಬೇಕು
ಛೇ....!! ನನ್ನ ಕಂದನಿಗೆ ಮಲತಾಯಿಯ ತರುವುದೆ ?!
ನನ್ನನ್ನ, ನನ್ನ ಕಂದನನ್ನ ಒಪ್ಪಿ ಬಂದವಳು
ಹೊತ್ತೆತ್ತವಳಂತೆ ನೋಡಿಕೊಳ್ಳುವಳೆ, ಆದರಿಸುವಳೆ ?
ಬೇಡವೇ.... ಬೇಡ, ಮತ್ತೆಂದಿಗೂ ಈ ಯೋಚನೆಯೇ ಬೇಡ
ಅಳುವ ಕಂದನ ನಾ ಎಷ್ಟೇ .... ಸಂತೈಸಿದರೂ
ಹೆತ್ತವಳಂತೆ ಮುದ್ದಿಸಿ, ರಮಿಸಲಾದೀತೆ ?
ತನ್ನೆದೆಯ ರಕ್ತವ ಹಾಲಂತೆ ಕುಡಿಸಲಾದೀತೆ ?
ಎದೆಗವಚಿ, ಏನೂ... ಮಾಡಲಾಗದ ಸ್ಥಿತಿಗೆ
ನಾ ಎಷ್ಟೆಲ್ಲಾ ಒದ್ದಾಡಿ ಮಮ್ಮುಲ ಮರುಗಿದ್ದೆ
ನನ್ನವಳು ಇದ್ದಿದ್ದರೆ ನಾ ಇಷ್ಟೆಲ್ಲಾ ಕಷ್ಟಪಡಬೇಕಿತ್ತೆ ?
ಚೊಚ್ಚಲ ಹೆರಿಗೆಯಲ್ಲಿ ಹೆತ್ತು, ಮಗುವ ಕೈಗಿತ್ತು
ಸತ್ತು ಸಂಪಿಗೆಯ ಮರವಾಗಿ ಹೋಗಿದ್ದಳು
ಹಿಂದೆಯಿಲ್ಲ ಮುಂದೆಯಿಲ್ಲ, ಬಂಧು ಬಳಗ ಮೊದಲೇ ಇಲ್ಲ
ಅನಾತಳಿಗೆ ಅನಾತನಾದ ನಾನೇ... ಪತಿ, ದೈವ ಎಲ್ಲಾ...
ಆ ದುರ್ವಿಧಿಗೂ... ನಮ್ಮ ನೋಡಿ ಸಹಿಸಲಾಗಲಿಲ್ಲವೇನೋ
ಕಡು ಕಷ್ಟಗಳ ಕೊಟ್ಟಿದ್ದರೂ ನಾ ಎಂದೂ ಎದೆಗುಂದುತ್ತಿರಲಿಲ್ಲ
ಅಯ್ಯೋ...!! ನನ್ನ ಮುದ್ದು ಕಂದಾ...
ನೀ ತಾಯಿಯಿಲ್ಲದ ತಬ್ಬಲಿಯಾದೆಯಲ್ಲೇ...
ನೀ ಅಮ್ಮಾ... ಎಂದು ಯಾರನ್ನು ಕೂಗಿ ಕರೆಯುವೆ ?
ಯೋಚನೆ, ಆಲೋಚನೆಯ ತರ್ಕಗಳ ಜಂಜಾಟಕ್ಕೆ ಸಿಲುಕಿ
ಆದದ್ದೆಲ್ಲಾ ಒಳ್ಳೆಯದ್ದಾಗಲಿ ಎಂದೇ... ಇವಳ ಮೆಚ್ಚಿದ್ದೆ !!
ಶಿವಚೆನ್ನ ೧೩.೦೨.೧೫

" ಬೇಡ ರೀ ನನ್ನ ಫಜೀತಿ "

ನನ್ನ ಮುದ್ದಿನ ಅರ್ಧಾಂಗಿ ದಿಢೀರ್ ಫೋನಾಯಿಸಿ
ರ್ರೀ!! ಏನು?, ತಿಂದದ್ದು ನಿಮಗೆ ಹೆಚ್ಚಾಯಿತೋ.... ಹೇಗೆ ? ಮೊದಲು ನೀವು fb ಯಲ್ಲಿ ಬರೆಯುವುದ ಕೂಡಲೆ ನಿಲ್ಲಿಸಿ; ದಿನಕ್ಕೊಂದೊಂದು " ಬೇಡ ಸ್ವಾಮಿ ನನ್ನ ಫಜೀತಿ "
ನಿಮ್ಮ ಕಲ್ಪನೆಯ ಫಜೀತಿ ಸರಮಾಲೆಗಳ ಪ್ರಕಟಣೆ ಬೇರೆ ! ಇದನ್ನೋದಲು ಕಾಯುವ ಒಂದಷ್ಟು ನಿಮ್ಮಂತಹ ಜನರ ಗುಂಪು ನನ್ನನ್ನೇ ದಿನನಿತ್ಯ ಕಾಟ ಕೊಡುವ ರಾಕ್ಷಸಿ ಎಂಬಂತೆ ಚಿತ್ರಿಸಿ ಅಂತರ್ಜಾಲದಲ್ಲಿ ಬಿಂಬಿಸುವುದು ಬೇರೆ
ಹೆಣ್ಮಕ್ಕಳೆಂದರೆ ಹಾಸ್ಯವೋ ಅಥವಾ ಅಪಹಾಸ್ಯವೊ
ಎಲ್ಲರೂ ನಿಮ್ಮನ್ನ ಮೆಚ್ಚಿ, ಹೊಗಳುವರೆಂದುಕೊಂಡಿರೋ ಹೇಗೆ ? ಇವನೆಂಥಹ ಗಂಡಸ್ಸೆಂದು ಹಿಂಬದಿಯಲ್ಲಿ ಹಾಡಿಕೊಂಡು ನಗದಿರರು
ಇದ ಓದಿದ ಸ್ತ್ರೀಯರೆಲ್ಲ ಹಿಡಿ ಶಾಪ ಹಾಕಿಯಾರು ಎಚ್ಚರ !! ಗೊತ್ತೇನ್ರಿ ನಿಮಗೆ ? ನಮಗೂ ಸ್ತ್ರೀ ಸಂಘಟನೆಗಳಿವೆಯಂತ ಸೌಟು, ಲಟ್ಟಣಿಗೆ, ಪೊರಕೆ, ಭಿತ್ತಿ ಚಿತ್ರಗಳ ಹಿಡಿದು
ಬೀದಿ ಬೀದಿಯಲ್ಲಿ ನಿಂತು ಪ್ರತಿಭಟಿಸಬೇಕಾದೀತು
ತಪ್ಪಿದರೆ, ಗೊತ್ತಲ್ಲ ಸಂಜೆ ಮನೆಗೆ ಬಂದಾಗ ನಿಮಗೆ ಪೂಜೆ ! ನಿಂದೊಳ್ಳೆ ಕತೆಯಾಯಿತಲ್ಲೇ ... ನಾನೇನು ಬೇಕೂಂತ ಹೆಣ್ಮಕ್ಕಳ, ನಿನ್ನ ಬಗ್ಗೆ ಬರೆದೆನೆಂದು ಕೊಂಡೆಯೋ ಹೇಗೆ ?
ಈ ಜಗತ್ತಿನಲ್ಲಿ ಅಲ್ಲಲ್ಲಿ (ನಮ್ಮ ಮನೆಯಲ್ಲಿ) ನಡೆಯುವಂತದ್ದು ತಾನೆ
ನಾ ನಿನಗೆ ಹೀಗೆ ಹೆದರುವುದ ಕಂಡೇ... ನನ್ನ ಮಿತ್ರರೆಲ್ಲ ಛೆಛೆಛೇ....!!! ಏನ್ ಗುರೂ ಅತ್ತಿಗೆಗೆ ನೀನೇ ಹೀಗೆ ಹೆದರುವುದೆ? ಒಂಚೂರು ಗುಂಡು ಹಾಕಿ, ಗುಟುರು ಹಾಕಿ ನೋಡು ಗುರೂ... ಕಮಕ್ ಕಿಮಕ್ ಎನ್ನದೆ ಹೆದರಿ ಮೂಲೆಯಲ್ಲಿ ಸೇರಿಕೊಳ್ಳುವರು ಆಗ ಸ್ಟ್ರಾಂಗು ಅವರೋ... ನೀನೋ... ಅಂತ ಗೊತ್ತಾಗುವುದು ಮಾತಿಗೆ ಮಾತು ಬಂದು ಆಗ ಬರದದ್ದೇ.... ಮಾರಾಯ್ತೀ " ನಾನೇ.... ಸ್ಟ್ರಾಂಗು " ಅಂತ
ಹೀಗೇನು ಹೆಣ್ಮಕ್ಕಳೇ ಸ್ಟ್ರಾಂಗು ಬಿಡು
ಬೆವರೊರಸಿ ಕೊಂಡು ಫೋನ್ ಕುಕ್ಕಿದ್ದೆ
ಅವಳ ಮೇಲೆ ನನ್ನ ಕೋಪ, ಪ್ರತಾಪಗಳ ತೋರಿಸಲಾದೀತೆ !

ಬೇಡ ರ್ರೀ... ನನ್ನ, ನನ್ನವಳ ಫಜೀತಿ

ರ್ರೀ... ಎಲ್ಲಿದ್ದೀರಿ ?!  ಸರಿಯಾಗಿ ಕಿವಿ ಕೇಳ್ತಿದೆ ತಾನೆ ನಿಮ್ಗೆ ?!
ಛೆಛೆಛೇ ..!! ನೀವೋ...., ಆ ನಿಮ್ಮ ಡಬ್ಬಾ ಫೋನೋ...
ಯಾವಾಗ್ಲೂ ಬ್ಯುಸಿ ಅಥವಾ  ಔಟಾಫ್ ಆರ್ಡರ್
ಇತ್ತೀಚೆಗೆ ಅದು ಇದು ಹೇಳಿ, ಹೊಸಹೊಸ ಕತೆಗಳ ಕಟ್ಟಿ;
ಬರೀ ಬುರುಡೆ ಬಿಡುವುದೇ... ಆಯ್ತು ನಿಮ್ಮ ಜಾಯಮಾನ
ಯಾಕ್ರಿ ಬೇಕು ನಿಮಗೆ ? ಮನೆ, ಮಡದಿ, ಮಕ್ಕಳು ಸಂಸಾರ  ಎಲ್ರೂ ರೆಡಿಯಾಗಿರಿ ಮಧ್ಯಾಹ್ನ PVRಲ್ಲಿ PK ನೋಡ್ಕೊಂಡು ಶಾಪಿಂಗ್ ಮಾಡ್ಕೊಂಡು ಬರೋಣ ಅಂತ ಹೇಳಿ ಹೋದವರು
ಗಂಟೆ ಎರಡಾದ್ರೂ ಇನ್ನೂ ಪತ್ತೆಯೇ... ಇಲ್ಲ
ಈಗ ಬರ್ತಾರೆ ಸುಮ್ನಿರ್ರೊ ಅಂತ ಮಕ್ಕಳಿಗೆ ಸಮಾಧಾನಿಸಿ
ಕಣ್ಣಿಗೆ ಎಣ್ಣೆ ಬಿಟ್ಕೊಂಡು ಕಾದಿದ್ದೇ ಬಂತು ನಮ್ಮ ಭಾಗ್ಯ
ಶ್ಶ್...!! ನೀವೇನೂ ಮಾತಾಡ್ಬೇಡಿ, ನನಗೆ ಬಂದಿರೊ ಕೋಪಕ್ಕೆ
ನಿಮ್ಮನ್ನ ಅಂದು ಹಾಡಿದರೇನು ಬಂತು ಪ್ರಯೋಜನ
ನನ್ನ ಕೈಗೆ ಸಿಗಬೇಕು ಆಗ ಇದೆ ನೋಡ್ರಿ ನಿಮಗೆ ಹಬ್ಬ
ಈಗಿಂದೀಗಲೇ ಮನೆಗೆ ಬೇಗ ಬಂದ್ರೆ ಸರಿ ಹೋಯ್ತು
ಇಲ್ಲಾಂದ್ರೆ ಇಂದು ನಿಮಗಿದೆ ತಕ್ಕ ಪೂ....ಜೆ !!
ಪೂಜೆ ಮಾಡ್ಲಿಲ್ಲಾಂದ್ರೆ  ನನ್ನ ಹೆಸರು ರುಕ್ಕೂನೇ... ಅಲ್ಲ

ಸಾರಿ ಸಾರಿ.... ಎಕ್ಸಟ್ರೀಮ್ಲಿ ವೆರಿ ವೆರಿ ಸಾರಿ ಕಣೆ ರುಕ್ಕೂ..
ಗೆಳೆಯನ ಕ್ರಿಸ್‌ಮಸ್ ಪಾರ್ಟಿಯ ಗಲಾಟೆಯಲ್ಲಿ
ನಾ ಹೇಳಿದ್ದು ಎಲ್ಲಾ ಮರೆತೇ ಹೋಗಿತ್ತು ನೋಡು
ಇನ್ನು ಅರ್ಧ ಗಂಟೇಲಿ ನಾ ಅಲ್ಲಿದ್ದರೆ ಸರಿ ತಾನೆ ನಿನಗೆ  
ಪ್ಲೀಸ್ ಪ್ಲೀಸ್ ಲೇಟಾದ ತಪ್ಪಿಗೆ ತಪ್ಪುಕಾಣಿಕೆಯಿದೆಯೇ
ಸರಿ ಸರಿ ಇದಕ್ಕೇನು ಕಮ್ಮಿಯಿಲ್ಲ ಬಿಡಿ ನಕ್ಕಿದ್ದಳು
ಇನ್ನೂ... ಲೇಟಾದರೆ ಇವಳಿಂದ ಉಳಿಗಾಲ ಉಂಟೇ ...??
ಉರಿದು ಮುಕ್ಕುವಳೆಂದು ಹೆದರಿ ಮನೆಗೆ ಬಂದರೆ
ತೆರೆದ ಬಾಗಿಲು ತೆರೆದಂತಿದೆ ಎಲ್ಲೆಲ್ಲೂ ನೀರವ ಮೌನ !!
ಛೆ ಛೆಛೆಛೇ!!!! ಏನೇ ಇದು ರುಕ್ಕೂ  ನಿನ್ನ ಅವತಾರ
ನಾ ಅವಳ ಮುಟ್ಟಿ ಮಾತಾಡಿಸಿದ್ದೇ.... ತಪ್ಪಾಯ್ತು ನೋಡಿ
ಕೆಂಡದಂತ ಕೆಂಪಾದ ಕಣ್ಣು, ಅಸ್ತವ್ಯಸ್ತವಾದ ತಲೆಗೂದಲು
ಅವಳು ನನ್ನ ನೋಡಿ ಹ್ಞೂಂಕರಿಸಿದ ರೀತಿಗೆ ಭಯಭೀತನಾಗಿ
ಕುಡಿದಿದ್ದ ನಶೆಯಿಳಿದು ಮಾತುಗಳು ಹೊರಬರದೆ ತಡವರಿಸಿದ್ದೆ;
ಏನೋ ....  ನನ್ನನ್ನೇ ಮುಟ್ಟುವಷ್ಟು ಧೈರ್ಯ ಬಂತೆ ?
ಬಾ... ರೋ.... ಬಾ ಬಾ.... ಗಹಗಹಿಸಿ ನಕ್ಕಿದ್ದು ಕಂಡು
ಪಿಶಾಚಿಯೋ, ಯಾವುದೋ ದೆವ್ವ ಇವಳ ಮೆಟ್ಟಿರಬೇಕು
ಮನೆಯಲ್ಲಾ ನನ್ನನ್ನೇ ಅಟ್ಟಾಡಿಸಿಕೊಂಡು ಓಡಾಡಿಸುವುದೇ?
ಆಂಜನೇಯ, ವೀರಭದ್ರರ ಅಷ್ಟೋತ್ತರಗಳ ಹೇಳಿದರೂ
ಭಯಪಡದ ಇದೆಲ್ಲೋ... ಗಟ್ಟಿಪಿಂಡದ ಭೂತವಿರಬೇಕು
ಲೆ ಲೇ...ರುಕ್ಕೂ ... ಬೇರೆ ಯಾರೂ ಅಲ್ಲವೆ ಅಲ್ಲ ನಾನೇ
ನಿನ್ನ ಕೈಹಿಡಿದ, ತಾಳಿ ಕಟ್ಟಿದ ಗಂಡ ಕಣೇ...
ನನ್ನನ್ನ ಬಿಟ್ಟು ಬಿಡೆ ಮಾರಾಯ್ತೀ  ನಿನ್ನ ದಮ್ಮಯ್ಯಾ ....
ನನ್ನ ಅರಚಾಟಕ್ಕೆ, ಕೂಗಾಟಕ್ಕೆ ಅಕ್ಕಪಕ್ಕದವರೆಲ್ಲಾ ಬಂದು
ನನ್ನವಳ ಬಿಗಿಯಾಗಿ ಹಿಡಿದರೂ
ಹೆ ಹೇ... ಗಂಡ ಅಂತೆ ಗಂಡ, ಇವನ್ಪಿಂಡ ನಿದ್ದೆಗೆ ಜಾರಿದವಳ  ಹಾಸಿಗೆಯಲ್ಲಿ ಮಲಗಿಸಲು ಹೊತ್ತೊಯ್ಯುವಾಗ ಕಾಲಿಗೆ ಸಿಕ್ಕ
ವೈನ್ ಬಾಟಲಿಯಿಂದ ಗೊತ್ತಾಗಿದ್ದು ಇವಳ ಹುಚ್ಚಾಟವೆಲ್ಲ  ...
ಶಿವಚೆನ್ನ ೨೬.೧೨.೧೪

ನಮ್ಮ ಗೋಳು ಯಾರು ಕೇಳುವರು ...?

ತೆಂಗಿನ ನಾರು, ಬೇರು ಕೊಕ್ಕಲಿ ಹೆಕ್ಕಿ ತಂದು
ನಾ ಚಂದದ ಗೂಡು ಕಟ್ಟಿದರಲ್ಲವೆ
ನನ್ನದೂ... ಒಂದು ಸಂಸಾರ,
ಮರಿ ಗುಬ್ಬಿಗಳ ಪರಿವಾರ
ನಿಮ್ಮಂತೆ ನಾವಿಲ್ಲ ಬಿಡಿ
ನಾಗರೀಕತೆಯ ಅಮಲಿನಲಿ
ಹುಚ್ಚೆದ್ದು ಕುಣಿವ ನಿಮ್ಮೀ ಕನಸುಗಳಿಗೆ
ನಾವು ತಾನೆ ಬಲಿ !
ಹುಳ, ಹುಪ್ಪಟೆ ಕಾಳು, ಕಡ್ಡಿಗಳ
ಒಂದೊಂದೇ ಹೆಕ್ಕಿ ತಿಂದು ಬದುಕುವ
ರೈತ ಸ್ನೇಹಿಗಳು ನಾವು....
ಮರ ಗಿಡ, ಹಳ್ಳ ಕೊಳ್ಳ,
ಕೆರೆ ಕಟ್ಟೆಗಳ ಹೊಡೆದುರುಳಿಸಿ
ಮಣ್ಣನಂಬಿ ಬದುಕುವವರ ಒಕ್ಕಲೆಬ್ಬಿಸಿ,
ಭೂಗಳ್ಳರಾದಿರಿ
ಗಗನಚುಂಬಿ ಕಟ್ಟಡಗಳ ಕಟ್ಟಿ
ಕಾಂಕ್ರೇಟ್ ಕಾಡಾಗಿಸಿದಿರಿ
ಕಾರ್ಖಾನೆಗಳು ಉಗುಳುವ ಎಂಜಲಿಗೆ
ಭೂತಾಯಿಯೂ ಮೈಲಿಗೆಯಾಗಿ
ಅಂತರ್ಜಲ ಬಸಿದು ವಿಷವಾಗಿ
ನೀರಿಗೂ... ಆಹಾಹಾಕಾರ, ಗಾಳಿಗೂ ತಾತ್ಸಾರ
ನೀವೇ ಮುಂದೊಂದು ದಿನ ಬೇಸತ್ತು
ಮುಂದಿನ ಪೀಳಿಗೆಯ ಮಕ್ಕಳಿಗೆ
ಇದೇ ಗುಬ್ಬಚ್ಚಿ ಎಂದು ನನ್ನೀ... ಭಾವಚಿತ್ರವ ತೋರಿಸುವಿರಿ ಚಿತ್ರಕೃಪೆ : Balasubrahmanya Nimmolagobba Balu

" ನನ್ನವಳ ಎದೆಗಾರಿಕೆ "

ಮೊದಮೊದಲು ಕಣ್ಣಿಗೆ ಕಂಡರೆ ಸಾಕು
ಭಯಕೆ, ಬಾಯಿ ಬಾಯ್ಬಿಡುತ್ತಿದ್ದ ನನ್ನವಳು
ಇತ್ತೀಚೆಗಂತೂ ಮೀಸೆ ತಿರುಗಿಸಿ ನಿಂತರೂ
ಎದಿರು ಬಂದು ಅಡ್ಡಾಡಿದರೂ ಹೆದರಳು
ಕೈಗೆ ಸಿಗದೆ ನುಸುಳಿ ತಪ್ಪಿಸಿಕೊಳ್ಳದಿರಲೆಂದು,
ಕೂಗಾಡುವುದ ಅಕ್ಕಪಕ್ಕದವರು ಕೇಳಿಸಿ ಕೊಂಡರೆ
ಹೊರಗೆಲ್ಲಿ ನಿಲ್ಲಿಸಿ ಕೇಳುವರೆಂದು ಮುಂದಾಲೋಚಿಸಿ
ಮಗಳಿಗೆ ಹೇಳಿ, ಎಲ್ಲಾ ಕಿಟಕಿ ಬಾಗಿಲುಗಳ ಮುಚ್ಚಿಸಿ
ನಿನಗೆ ಇಂದು ಕಾದಿದೆ ಬಾರೋ ಮಾರಿಯ ಹಬ್ಬ
ಒಂದು ಕೈ ನೋಡಿಯೇ ಬಿಡುವ, ನಾನೋ ನೀನೋ
ಒಟ್ಟಿನಲ್ಲಿ ನಾನಿರಬೇಕು ಅಥವಾ ನೀನಿರಬೇಕು ಈ ಮನೆಯಲ್ಲಿ ; ನಿನ್ನದೋ ಇಲ್ಲಾ ನನ್ನದೋ ಪಾರುಪತ್ಯ ಎಲ್ಲರಿಗೂ ತಿಳಿಯಲಿ ಕೈಯಲ್ಲಿ ಪೊರಕೆ ಹಿಡಿದು ಹೂಂಕರಿಸಿ, ಝೇಂಕರಿಸಿ ರಣಚಂಡಿಯಂತೆ ಒಮ್ಮೆ ನಿಂತರೆ,
ಇದ ಕಂಡು ಅಳ್ಳೆದೆಯವನೂ ಕೂಡ ಗಡಗಡ ನಡುಗ ಬೇಕು !

ತಾಯಿ ಮಗಳಿಬ್ಬರೂ ಹತ್ತಾರು ಜಿರಳೆಗಳ ಬಡಿದು ವೀರಾವೇಶದಿಂದ ನನ್ನತ್ತ ನೋಡಿ ನಗೆ ಬೀರಿದ್ದ ಕಂಡು ನನ್ನೊಳಗೊಳಗೇ......... ಅಸಹಾಯಕ ನಿಟ್ಟುಸಿರು ;
ಹಾಳಾದ್ದು ಈ ಜಿರಳೆಗಳಿಂದಾಗಿಯೇ ನನ್ನವಳಿಗೆ ಇಷ್ಟೆಲ್ಲಾ ಎಲ್ಲಿಲ್ಲದ ಭಂಡ ಧೈರ್ಯ ಬಂದದ್ದು ಎಲ್ಲಾ ನನ್ನ ಗ್ರಹಚಾರ, ದುರದೃಷ್ಟ ನೋಡಿ ಇಂದು ಎಲ್ಲಾ ತಲೆಕೆಳಕಾಗಿ ಬುಡಮೇಲಾಗಿದೆ ಮೊದಲಾಗಿದ್ದರೆ ಹೆದರಿ ಓಡೋಡಿ ಬಂದು ನನ್ನೆದೆಗೆ ಒರಗಿ ಕಣ್ಮುಚ್ಚುತ್ತಿದ್ದ ನನ್ನವಳು ಇಂದು
ಜಿರಳೆಗಳ ಪಾಲಿಗೆ " ರಣಚಂಡಿ " !!!