ಅಕ್ಷಯ

ಅಮ್ಮೂ....,

ನನ್ನದೇನೂ ತಪ್ಪಿಲ್ಲವೆ ?

ಅವಳದೂ ತಪ್ಪಿಲ್ಲ,

ಆಗಿದ್ದೆಲ್ಲಾ ನಿನ್ನಿಂದಲೆ

ಅಕ್ಷಯ ತೃತೀಯ ದಿನ 

ನಿನಗೆ ತಾಳಿ ಕಟ್ಟಿದ್ದರಿಂದ

ಇಂದು ಅಕ್ಷತಾಳೊಂದಿಗೆ 

ಬಾಳು ಅಕ್ಷಯವಾಯಿತಷ್ಟೆ ! 

ನೆನಪುಗಳ ತೂಗುಯ್ಯಾಲೆಯಲ್ಲಿ

ನನ್ನವಳ ಖುಷಿಗೆ 

ಕಾರಣ ಏನೆಂದು ಗೊತ್ತಾಗದೆ,

ನಾನಿಲ್ಲಿ ಒದ್ದಾಡುತ್ತಿದ್ದರೆ

ಒಬ್ಬರಾದರು ಬಾಯಿ ಬಿಡಬಾರದಿತ್ತೆ

ಇಂದು ವಿಶೇಷವೇನಿರಬಹುದು ? 

ಜನುಮ ದಿನ, ವಾರ್ಷಿಕೋತ್ಸವ 

ಹಾಳಾದ್ದು ಒಂದೂ ನೆನಪಿಗೆ ಬರದೆ

ನೆನಪುಗಳು ಇಂದೇ ಮುಷ್ಕರ ಹೂಡಬೇಕಿತ್ತೆ ;

ಎಲ್ಲವೂ... ಗೊಜಲು ಗೊಜಲು 

ಏನೆಂದು ಅವಳ ಕೇಳಲಿ ?

ಕೇಳಲೂ ಏಕೋ ಸಂಕೋಚ  

ನನ್ನೊಳಗಿನ ಭಯಕೆ ಹೆದರಿ

ಗೊಂದಲದಲ್ಲಿದ್ದ ನನ್ನೆಡೆಗೆ ಒಮ್ಮೆ ನೋಡಿ 

ಕಣ್ಣು ಮಿಟುಕಿಸಿ, ಹಾಗೆ ಹೋದವಳ ಬಿಡದೆ 

ಸೊಂಟ ಬಳಸಿ ಬಿಡಬೇಕಿತ್ತು

ಆಗಲಾದರು ನಿಜ ಹೇಳುತ್ತಿದ್ದಳೇನೋ... 

ಕಾರುಬಾರು

ಆಗಾಗ ನನ್ನವಳ ಜೊತೆ

ಬೇಕೆಂದೇ ನಾ ಜಗಳ ತೆಗೆಯುತ್ತೇನೆ

ಮುನಿದು ತವರಿಗೆ ಹೋಗಲಿ ಎಂದು.

ತವರಿಗೆ ಹೋಗುವುದೆಂದರೆ 

ಅವಳಿಗೂ ಅಷ್ಟಕಷ್ಟೆ 

ಇಷ್ಟವಿಲ್ಲದಿದ್ದರೂ 

ಅನುಮಾನಿಸುತ್ತಲೇ ಹೋದವಳ 

ಬೆನ್ನಿಗೆ ಬಾಗಿಲು ಬಡಿದು,  

ಒಂದೊಂದೇ ಗುಟುಕು ಗುಟುಕರಿಸಿ

ಉಪ್ಪಿನಕಾಯಿ ಚಪ್ಪರಿಸುವಾಗ

ಪಕ್ಕದಮನೆ ಪದ್ಮಳ ಗೆಜ್ಜೆಯ ನೂಪುರಕೆ

ಮೈಮನ ಪೂರಾ ಅಸ್ತವ್ಯಸ್ತ. 

ಲಟ್ಟಣಿಗೆ

ನನ್ನವಳು
ಲಟ್ಟಣಿಗೆಯಿಂದ
ಎಂದೂ ಹೊಡೆದವಳೇ ಅಲ್ಲ
ತಿರುಗಿಸುವ ಪರಿಗೆ
ನಾನೇ ಹೆದರಬೇಕಷ್ಟೆ;
ಹಲವರಿಗೆ ಅನುಮಾನ ಬಂದು
ನನ್ನ ತಲೆಯೊಳಗೆ ಕೈಯಾಡಿಸಿ
ಎಲ್ಲಿಯೂ ಗಾಯವಿಲ್ಲವಲ್ಲ ಗುರೂ
ಊದಿದ್ದರೆ ಗೊತ್ತಾಗುತ್ತಿತ್ತು
ಎಲ್ಲೋ ಮೂಗೇಟು ಬಿದ್ದಿರಬೇಕು
ಅತ್ತಿಗೆ ಮೆತ್ತಗೆ ಮೊಟಕಿರಬೇಕು.

ಹೆಬ್ಬುಲಿ

ಲಟ್ಟಣಿಗೆಯಲ್ಲ
ಮೊಗಚೊ ಕೈ ತೋರಿಸಿದರೂ
ನಮ್ ಯಜಮಾನ್ರು ಹೆದರೋರಲ್ಲ
ಅವರ ಒಂದು ಕುಡಿ ನೋಟಕೆ
ಬಿಸಿಯುಸಿರಿನ ಶಾಖಕೆ,
ಅವರ ಬೆರಳ ಸ್ಪರ್ಶಕೆ
ನಾನೇ ಕರಗಿ ನೀರಾಗುವೆ
ಅಂತಹುದರಲ್ಲಿ ನೀನ್ಯಾವ ಲೆಕ್ಕ ?
ಹೇಗೂ ಈಗ ಯಜಮಾನರಿಲ್ಲ
ಇದ್ದಾಗ ತೋರಿಸು ನಿನ್ನಾರ್ಭಟ
ಹುಲ್ಲೆಯಾಗುವೆಯೊ
ಇಲ್ಲಾ... ಹೆಣ್ಣು ಹುಲಿಯಾಗುವೆಯೋ
ಕಾಲವೇ ನಿರ್ಧರಿಸಲಿ.

ಹೀಗೂ ಉಂಟೆ !?

ಎಕ್ಸಟ್ರೀಮ್ಲೀ....
ವೆರಿ ವೆರಿ ಸಾರಿ ಡಿಯರ್
ಈಗಷ್ಟೇ ನನಗೂ ವಿಷಯ ಗೊತ್ತಾಗಿದ್ದು,
ನಿಮ್ಮೀ ಸ್ಥಿತಿಗೆ ಅಳಬೇಕೋ, ನಗಬೇಕೋ
ನೋಡಲು ಬರೋಣ ಎಂದರೆ
ನಿಮ್ಮ ಅಡ್ರೆಸ್ಸೇ... ಗೊತ್ತಿಲ್ಲ
ನಾ ಇದ್ದದ್ದರೆ ಆ ಕತೆಯೇ
ಬೇರೆಯೇ ಇರುತ್ತಿತ್ತು.
ಆ ಇಬ್ಬರು ಹೆಂಡತಿಯರು ಅಷ್ಟೊಂದು
ಮುಖ ಮೂತಿ ನೋಡದೆ
ಚಚ್ಚುವಾಗ ನನ್ನ ನೆನಪಾಗಲಿಲ್ಲವೆ? 
ನಾ ಹೆಚ್ಚೋ... ನೀ ಹೆಚ್ಚೋ... ಎಂದು
ಪೈಪೋಟಿಗೆ ಬಿದ್ದು ಹೊಡೆದಿರಬೇಕು.
ಕಾಲು ಮುರಿದದ್ದೋ..., ಅಥವಾ
ನಿಮ್ಮ ಹಲ್ಲನ್ನೊ...
ದುಃಖ ತಡೆದುಕೊಳ್ಳುವ ಶಕ್ತಿ
ಆ ಭಗವಂತ ಕೊಡಲಿ,
ಮುರಿದ ನಿಮ್ಮ ಮೂರು ಹಲ್ಲುಗಳಿಗೆ
ಇನ್ಶ್ಯೂರೆನ್ಸ್ ಆದರು ಇದ್ದಿದ್ದರೆ
ಕ್ಲೈಮ್ ಮಾಡಬಹುದಿತ್ತು.

ಯಾರಿವಳು?!
ಪರಿಚಯದವಳೂ ಅಲ್ಲ,
ಸಂಬಂಧಿಕಳೂ ಮೊದಲೇ ಅಲ್ಲ
ಬಂದ ಕೋಪಕ್ಕೆ ಯಾರ್ರೀ ನೀವು?
ನೀವೇನು Btvಯವರ,
ಅಥವಾ ಬೆನ್ನಿಗೆ ಬಿದ್ದಿರುವ ಬೇತಾಳನ
ಇದೆಲ್ಲಾ ನಿಮಗೆ ಹೇಗೆ ಗೊತ್ತಾಯ್ತು
ಹಾಳದವಳು ಕೂಲಾಗಿ
ನಾ ನಿಮ್ಮ ಕನಸು ಎನ್ನಬೇಕೆ ?
#ಶಿವಚೆನ್ನ 

#ಆಕರ್ಷಣೆ

ನನ್ನಾ...  ನಿನ್ನ,
ಕಣ್ಣುಗಳು ಕಲೆತಾಗಲೆಲ್ಲ
ಆ ನಿನ್ನ ಕೆಣಕುವ
ಕುಡಿನೋಟಕೆ
ತುಟಿಗಳು ಕಂಪಿಸಿ,
ಮೈ ಮನ ಅರಳಿದರೂ
ಅದೇಕೋ ಮಾತು ಬಾರದು
ಹೆದರಿಕೆಯಿಂದಲ್ಲ,
ಎದೆಗಾರಿಕೆಯೂ ಅಲ್ಲ
ಮತ್ತೆ ಮತ್ತೆ ನೋಡ ಬೇಕೆಂಬ
ಮಂತ್ರಮಗ್ನತೆಯ ಭಾವ
#ಶಿವಚೆನ್ನ