ಅಪ್ಪಾ.... ಅಮ್ಮಾ........
ನನ್ನ ಅನ್ಯತಾ ಭಾವಿಸದಿರಿ
ನಿಮಗೆ ಎದುರಾಡುವೆನೆಂದು;
ಎರಡನೆಯ ಹೆಂಡತಿಯಾಗಿ
ಆ ಮುದುಕನ ವರಿಸಲಾರೆ !
ನನ್ನ ವಯಸ್ಸಿನ ಮಗಳೋ
ಮಗನೋ ಅವನಿಗಿರ ಬೇಕಲ್ಲ
ಇಂದೋ ನಾಳೆಯೋ ಸಾಯುವವ
ಗಾಳಿಗೆ ಬಿದ್ದೋಗುವ ಒಣ ಮರವದು
ಮಸಣದ ಬಾಗಿಲ ತಟ್ಟುತ್ತಿರುವವ !
ಅವನ ಆಸ್ತಿ - ಅಂತಸ್ತಿಗೆ ಮರುಳಾಗಿ
ನನ್ನೆಲ್ಲಾ ಆಸೆ - ಆಕಾಂಕ್ಷೆಗಳಿಗೆ
ಮನದ ಭಾವನೆಗಳಿಗೆ ತುಪ್ಪ ಸುರಿದು
ನೀವೆಂದೂ ಬೆಂಕಿಯ ಹಚ್ಚದಿರಿ !
ಸಾಲ ತೀರಿಸಲಾಗದೆ ಮುದುಕನಿಗೆ
ಮಾರಿಕೊಂಡರೆಂದು ಜನ ತಿಳಿಯರೆ
ಕೋಟಿ ಕೋಟಿ ಹಣ, ಆಳುಕಾಳುಗಳಿದ್ದು
ರಾಶಿರಾಶಿ ಕಾಳುಕಡ್ಡಿ, ಮಣ ಬಂಗಾರವಿದ್ದು
ಆರೋಗ್ಯ ಹರೆಯವಿಲ್ಲದ ವಯಸ್ಸು ಮನಸ್ಸು
ಇಲ್ಲದಿರೆ, ನಾ ಸುಖಿಸುವುದಾದರೂ ಹೇಗೆ !
