ಪ್ರೀತಿ ನೀ ಇಲ್ಲದೆ ನಾ ಹೇಗಿರಲಿ

ನಿದಿರೇsssss,
ನೀ ಬರದೆ ಏಕೆ
ಎಲ್ಲಿ ಅಡಗಿ ಕುಳಿತೆ;
ಒಳಗು ಹೊರಗೂ
ಈ ನನ್ನ ನೋವಿಗೆ
ಬಂದು ಲಾಲಿ,
ಹಾಡ ಹಾಡದೆ
ಮನಸಿನೊಳಗೆ
ಅವಳ ನೆನಪು;
ಕಣ್ಣ ತುಂಬಿ ಹರಿವ ನೀರು
ಹೆಣ್ಣ ನಂಬಿ ಬರಿದೆ ನೋವು
ಮರೆಯಲೇಗೆ ನೀ ಹೇಳದೆ ॥

ಒಲವೇsssss,
ನೀ ಬರದೆ ಏಕೆ
ನನ್ನ ಮರೆತು
ನೀ ಎಲ್ಲಿ ಎಲ್ಲಿ;
ಅಲೆಯುತಿರುವೆ
ಈ ಹೃದಯದೊಳಗೆ
ನೀ ಬೆಸದ ಪ್ರೀತಿ,
ಪ್ರೇಮ ಬಂಧನ
ನಿನಗೆ ಕಾಲ ಕಸವೆ ಆಯಿತೆ
ನೂರು ಭಾವ ನೂರು ನೋಟ
ನೂರು ಒಲುಮೆ ಬಾಳ ಪಥಕೆ
ಬಿರಿದ ಭೂಮಿಯಾಯಿತೇಕೆ ॥

" ಬಾಡಿಗೆ ತಾಯಿ "

ನಾ ನಿನ್ನಾ ಹಡೆದವ್ವ,
ಎತ್ತಿ ಮುದ್ದಾಡಲಿಲ್ಲ
ನಿನ್ನಾ ನಾ ಹೊತ್ತು;
ಎದೆಗಪ್ಪಿ ತಿರುಗಾಡಲಿಲ್ಲ
ಎದೆಯ ಹಾಲನು ಕುಡಿಸಿ,
ನಿನ್ನಾ ನಗುವ ನಾ ನೋಡಲಿಲ್ಲ
ಅಳುವಾಗ ನಿನ್ನ ನಾ ರಮಿಸಲಿಲ್ಲ;
ಜೋ ಜೋ ಜೋ ಮುದ್ದು ಕಂದಾ
ನೀ ಮಲಗೆಂದು ನಾ ಹಾಡಲಿಲ್ಲ ॥

ಈ ನತದೃಷ್ಟೆ ತಾಯಿ ಪಾಪಿಷ್ಟಳಲ್ಲ
ನಿನ್ನ ಹಡದೇ, ನಾ ಹಣವ ಪಡೆದೆ
ಏಳೇಳು ಜೊತೆ ಹೆಜ್ಜೆಗಳ ಇಡದಲೇ
ಏಳೂ ಬೀಳುಗಳಲಿ ನಾ ಬಿದ್ದೇಳುತಲಿ, ದಾಂಪತ್ಯದಾನಂದವ ಕಾಣದಲೇ
ಪರರಿಗೆ ಮೈ ಮಾರಿಕೊಳ್ಳದೆಲೆ,
ಇನ್ಯಾರದೋ ತೆಕ್ಕೆಗೆ ನಾ ಜಾರದೆ
ನನ್ನಾ ಕಷ್ಟ ಕಾರ್ಪಣ್ಯಕೆ
ನಾ ನಿನ್ನ ಹಡೆದಂತ ತಾಯಿ;
ಬಾಡಿಗೆ ತಾಯಿ ನಾ ಬಾಡಿಗೆ ತಾಯಿ ॥

ಅಣ್ಣಾ - ತಂಗಿ

ಅಳಬೇಡ ನನ್ನಾ ಮುದ್ದೀನ ತಂಗ್ಯವ್ವ
ನಿನ್ನ ಅಣ್ಣಯ್ಯ ತವರಿಂದ ಬಂದೀವ್ನೀ
ಗಿಣ್ಣಾಲು ಒಬ್ಬಟ್ಟು ನಿನಗಾಗಿ ತಂದೀವ್ನಿ
ತಿಂದುಂಡು ಈ ಮಲ್ಲಿಗೆಯ ಮುಡಿದೇಳು ॥

ಮನೆಯಲ್ಲಿ ಅತ್ತೆಮ್ಮ ಮಾವಯ್ಯ ಭಾವ
ನಿನ್ನಾ ನಾದಿನಿ ಎಲ್ಲಾರೂ ಸೌಖ್ಯಾನೆ
ನಿಂಗೆ ತವರೂರ ಸುಖ ದುಃಖ ಮುಖ್ಯಾನೆ
ಹೇಳವ್ವ ನನ್ನಾ ಬಂಗಾರದ ಮುದ್ದೀನ ತಂಗಿ ॥

ಬಾವ ಬರುವಾ ಮುಂಚೆ ನೀ ಕುಚ್ಚೀನ
ಕಾಸಗಲದ  ಅಂಚಿನ ಸೀರೆಯ ಹುಟ್ಟು
ಹಚ್ಚಸಿರಿನ ಬಳೆ, ಬಂಗಾರವ ತೊಟ್ಟು
ಮಾಲಕುಮಿ ಬಂದಾಂಗೆ ಮೇಲೇಳು ॥

ನಾನೇ ನಿನಗೆಲ್ಲಾ ತಾಯ್ತಂದೆ ಬಂಧು ಬಳಗ
ನನ್ಮುಂದೆ ಹೇಳವ್ವ ನಿನ್ನಾ ಸುಖ - ದುಃಖಾವ
ನಿನ್ನತ್ತೆಮ್ಮ ಮಾವ ನಾದಿನಿ ಕಷ್ಟಾವ ಕೊಟ್ಟಾರೆ
ಸರಿಮಾಡಿ ನಾದಿನಿಯ ಕೈಯಾ ನಾ ಹಿಡಿಯುವೆ ॥

ಇನ್ಮುಂದೆ ನಿನಗಿರದು ಕತ್ತಾಲ ಬಾಳು
ಬಾಳೆಲ್ಲ ನೆಮ್ಮದಿಯ ಹಾಲ್ಬೆಳದಿಂಗಳು
ನನ್ನವ್ವ ಸುಖವಾಗಿ ನೀ ನಗುತಿರ ಬೇಕು
ನೂರ್ಕಾಲ ಹಾಯಾಗಿ ನೀ ಬಾಳಬೇಕು ॥

ಒಣ ಪ್ರತಿಷ್ಟೆ

ಹಠದಲ್ಲಿ ಇಬ್ಬರೂ
ಸರಿ ಸಮಾನರೇ
ಹಾಗೆಯೇ ಆಗಾಗ
ಮುನಿಸಿ ಕೊಳ್ಳುವುದರಲ್ಲಿ
ನನ್ನವಳದು ಎತ್ತಿದ ಕೈ;
ನಮ್ಮಿಬ್ಬರ ಜಗಳದಲಿ
ಪಾಪ, ಬಡಪಾಯಿ
ಮಕ್ಕಳ ಗತಿಯಂತೂ
ಆ ದೇವರಿಗೆ ಪ್ರೀತಿ ॥

ಬೇಡ ಬೇಡವೇ ರುಕ್ಕೂ
ಆ ಉದ್ಯೋಗದಾಸೆ,
ಜಂಜಾಟ, ನಿನಗೇಕೆ ಬೇಕು
ಈ ಮನೆ ಮಕ್ಕಳ ನನ್ನನ್ನ
ನೋಡಿಕೊಂಡರೆ ಸಾಲದೆ,
ಅಲ್ಲಿಯೂ ದುಡಿದು, ಸಾಕಾಗಿ
ನೀ ಇಲ್ಲಿಯೂ ದುಡಿಯಲಾರೆ;
ನಾ ಸಾಕಷ್ಟು ದುಡಿದು
ತಂದಾಕುವಾಗ, ತಿಂದುಂಡು
ನಮಗೂ ಒಂದಷ್ಟು ಬೇಯಿಸಿ
ಹಾಯಾಗಿ ಇರುವುದು ಬಿಟ್ಟು,
ನಿನ್ನದೆಂತಹದೇ
ಹೊಸ ಬಗೆಯ ವ್ಯಾಮೋಹ,
ಈ ಒಣ ಪ್ರತಿಷ್ಟೆ;
ನೆಮ್ಮದಿಯ ಜೀವನವ ಬಿಟ್ಟು
ನೀ ದುಡಿದು ಯಾರ ಉದ್ಧರಿಸ ಬೇಕು ॥

" ಕೊಲೆಗಾತಿ "

ನೀ ನನಗಾದರೂ
ಹೇಳ ಬಹುದಿತ್ತು,
ನನಗೀಗಾಗಲೇ
ನಲ್ಲನಿಹನೆಂದು
ನೀ ಮುಚ್ಚಿಟ್ಟು ನನಗೆ
ದ್ರೋಹ ಬಗೆದೆ;
ನಿನ್ನ ಸರಳ ಸಜ್ಜನಿಕೆಗೆ
ತಲೆದೂಗಿ
ನಿನ್ನ ಅಪ್ರತಿಮ ರೂಪಕೆ
ನಾ ಮಾರು ಹೋಗಿ,
ಒಪ್ಪಿಗೆಯಿತ್ತು
ತಪ್ಪು ಮಾಡಿದೆನೇನೋ ॥

ನನ್ನಾ ನಿನ್ನ
ನಿಶ್ಚಿತಾರ್ಥದ ದಿನದಂದು,
ನೀನೆಷ್ಟು ಸಂಭ್ರಮಿಸಿದ್ದೆ
ಏನೂ ತಿಳಿಯದ ಮುಗ್ಧೆಯಂತೆ
ನಿನ್ನವನ ಬಳಿ ಕರೆತಂದು
ನನಗೆ ಪರಿಚಯಿಸಿದ್ದೆ;
ಹಾಗಲಾದರೂ
ನೀ ಹೇಳಬಹುದಿತ್ತು,
ಈ ಮದುವೆಯ
ಮುರಿಯ ಬಹುದಿತ್ತು,
ಒಣ ಪ್ರತಿಷ್ಟೆಯೋ
ಹರಕೆಯ ಕುರಿಯೋ
ನಾನಾಗ ಅರಿಯದಾದೆ ॥

ಒಂದು ಸುಂದರ ಸಂಜೆ
ಫೋನಾಯಿಸಿ ಬನ್ನಿ,
ಹಾಗೆಯೇ ಒಂದಷ್ಟು
ಸುತ್ತಾಡಿ ಬರುವ
ಇನ್ನೆರಡು ವಾರದಲಿ ನಮ್ಮ
ಮದುವೆಯಿದೆ, ಈಗ ಬೇಡ
ಮದುವೆಯಾದ ಮೇಲೆ
ಇವೆಲ್ಲಾ ಇದ್ದದ್ದೇ ಎಂದರೂ
ಬಿಡದೆ ನನ್ನ ಕರೆದ್ಯೊದಿದ್ದೆ
ನೀಲಾಕಾಶದಿ ಹಾರುವ
ಲೋಹದ ಹಕ್ಕಿಗಳ ತೋರಿಸಿ
ನನ್ನ ಮರಣಕೆ ಮುಹೂರ್ತವಿಟ್ಟು
ಎಷ್ಟು ಸಮಯೋಚಿತವಾಗಿ
ನೀ ಕೊಲ್ಲಿಸಿದ್ದೆ " ಕೊಲೆಗಾತಿ " ॥

ಆಲೋಲಿಕ

ಒಲವಿನ ಗೆಳತಿ, ನಾ ನಿನಗೆ
ಹೇಳಬೇಕೆಂದು ಕೊಂಡ
ಈ ಮನದ ಮಾತುಗಳು,
ನಿನ್ನ ಕಂಡ
ಮರು ಘಳಿಗೆಯೇ;
ಹೇಳಲಾಗದೆ
ನನ್ನಲ್ಲಿಯೇ ಹಾಗೆಯೇ
ಉಳಿದಾಗ
ನೀ ಹೇಳಿದ್ದೆ ನನಗೆ,
ನಾಡಿದ್ದು ನನ್ನ ನೋಡಲು
ದೂರದ ಊರಿಂದ
ಹುಡಗನ ಮನೆಯವರು ಬರುವರೆಂದು
ಆ ಕ್ಷಣವೇ ಈ ಭೂಮಿ ಬಿರಿದು
ಬಾಯ್ತೆರೆಯ ಬಾರದೆನಿಸಿ
ಕಣ್ಣ ತುಂಬಿ, ಮನ ತುಂಬಿ
ಕಂಬನಿ ಬಂದಿತ್ತು; 
ನಿನಗೆ ತೋರ್ಗೊಡದೆ
ನಾ ಜೋರು ನಗೆಯಲ್ಲಿ ನಕ್ಕಿದ್ದೆ ॥

ಅಯ್ಯೋ...
ಹುಚ್ಚು ಹುಡುಗಾ,
ನಾ ನಿನ್ನ ಬಿಟ್ಟು
ಬಾಳುವೆನೇನೋ
ನೀನಿಲ್ಲದೆಯೇ;
ನಾ ಹೇಗೆ ಬದುಕುವೆನೋ
ನೀ ನನಗೆ ಹೇಳಲಾಗದೆ
ಒದ್ದಾಡುವುದ ಕಂಡು
ತಮಾಷೆಯ ಮಾಡೋಣವೆನಿಸಿ
ಒಂದಷ್ಟು ಗೋಳಾಡಿಸುವ ಎಂದು
ಹಾಗೆ ಹೇಳಿದೆನೋ ನಲ್ಲಾ
ನನ್ನೊಳಗೆ ತಡೆಯಲಾಗದ
ಧುಮ್ಮಿಕ್ಕುವ ನಗುವ ಕಂಡು
ಇಡೀ ಉಧ್ಯಾನ ವನವೆಲ್ಲಾ
ಓಡಿಸಿಕೊಂಡು ಸುತ್ತಾಡಿಸಿ
ನಿನ್ನ ಬಾಹುಗಳಲಿ ಬಂದಿಸಿದ್ದೆ ॥

ಅತಿಥಿ

ಅಪರೂಪಕ್ಕೊಮ್ಮೆ
ಅತಿಥಿಯಾಗಿ,
ಮನೆಗೆ ಬಂದರೆ
ಎಲ್ಲರಿಗೂ ಸಂತಸ;
ಬಂದವರಿಗೂ ಗೌರವಾದರ
ಮನೆ ಮಡದಿ ಮಕ್ಕಳ ಬಿಟ್ಟು
ಹೀಗೆ ವಾರಗಟ್ಟಲೆ
ನಿಮ್ಮಣ್ಣ ಬಂದು,
ಕುಳಿತರೆ ಹೇಗೆ
ಇದೇನು ಹಳ್ಳಿಯೆ
ಪೇಟೆ ಸ್ವಾಮಿ ಪೇಟೆ
ಪ್ರತಿ ವಸ್ತುವಿಗೂ
ದುಪ್ಪಟು ಬೆಲೆತೆತ್ತು ತರಬೇಕು
ನನಗೂ ಬೇಯಿಸಿ ಸಾಕಾಯ್ತು ॥

ನೀ ಸಾಕು ಮಾಡೇ ಮಾರಾಯ್ತಿ,
ನಿನ್ನ ಅರ್ಥವಿಲ್ಲದ ಗೊಣಗಾಟ
ನಿನ್ನ ಅಪ್ಪಾ ಅಮ್ಮ ಬಂದರೆ;
ತಿಂಗಳು ಗಟ್ಟಲೆ ಇದ್ದರೂ
ವಟಗುಟ್ಟದವಳು,
ನಮ್ಮವರು ಬಂದರೆ
ನಿನಗೆಲ್ಲಿಲ್ಲದ ಅಸಡ್ಡೆಯೆ ;
ಅವರಿಗೆ ರಾಜೋಪಚಾರ
ನಮ್ಮವರಿಗೆ ಬಾಯ್ಮಾತಿನ
ಉಪಚಾರ, ತಿರಸ್ಕಾರ
ಇದೇ ಮೊದಲು
ಇಂದೇ ಕೊನೆಯಾಗ ಬೇಕು;
ನಿನ್ನೆಲ್ಲಾ ತಾರತಮ್ಯದ
ತರಲೆ ಹುಚ್ಚಾಟಗಳು,
ಕೊನೆಗೊಳ್ಳದಿದ್ದರೆ
ನಾ ನಿನ್ನನ್ನೇ ಕಡೆಗಾಣಿಸುವೆ
ನಿನಗಿರಲಿ  ಮೈಮೇಲೆ ಎಚ್ಚರ ॥