" ಕನಸೋ.... ಇದು, ನನಸೋ.... ಇದು " !!!

ಗಾಡ ನಿದ್ದೆಯಲ್ಲಿದ್ದವನ ಎಬ್ಬಿಸಿತ್ತು
ಕಾಲಿಂಗ್ ಬೆಲ್ಲಿನ ಜೋರು ಶಬ್ಧ
ಬೆಚ್ಚಿ ಬಿದ್ದು , ಕಣ್ಣುಜ್ಜುತ ಮೇಲೆದ್ದಿದ್ದೆ
ಹೊತ್ತಲ್ಲದ ಹೊತ್ತಲ್ಲಿ ಯಾರಿರಬಹುದು...?
ನನ್ನವಳೋ...... ಮಲಗಿದರೆ ಮುಗಿಯಿತು
ಇವಳ ಎಬ್ಬಿಸಿದರೂ ಏನೂ ಪ್ರಯೋಜನವಿಲ್ಲ;
ಮೈಮೇಲೆ ಹಾವು, ಚೇಳು ಹರಿದಾಡಿದರೂ...
ಏನೂ.... ಗೊತ್ತಾಗದು, ಎಚ್ಚರವಾಗದು
ಇವಳೆಲ್ಲೋ... ಕುಂಭಕರ್ಣನ ವಂಶದವಳಿರಬೇಕು
ಹೇಳಲಾಗದೆ ನಿದ್ದೆಗಣ್ಣಲ್ಲೇ ತಡವರಿಸಿ ಎದ್ದು
ಬಾಗಿಲ ಬಳಿ ಬಂದು ಯಾರು ಯಾರದು...?
ನಾನೆ ರ್ರೀ... ಎಂದಿತು ಸುಕೋಮಲ ಹೆಣ್ಣಿನ ಧ್ವನಿ
ನಾನು ಎಂದರೆ ಹೆಸರು, ಊರಿಲ್ಲವೆ ನಿನಗೆ ?
ಗಡುಸಾಗಿ ಪ್ರಶ್ನಿಸಿ ಥೂ.. ಹಾಳಾದ್ದು ಹೊತ್ತುಗೊತ್ತಿಲ್ಲ
ಈ ಭಿಕ್ಷುಕರಿಗೆ ಊರಲ್ಲಿ ಹೇಳುವರಿಲ್ಲ , ಕೇಳುವರಿಲ್ಲ
ಮೈ ಬಗ್ಗಿಸಿ ದುಡಿಯದೆ, ಹಾಯಾಗಿ
ತಿರುದುಣ್ಣುವುದೇ.... ಇವರ ಕಾಯಕ
ಅಯ್ಯೋ... ಮುಂದೆ ಹೋಗಮ್ಮ ನಿನ್ನಂತವರು
ಬೆಳಿಗ್ಗೆಯಿಂದ ಬಂದು ಹೋದವರೆಷ್ಟೋ .....!!!
ನನ್ನವಳು ಏನೂ... ತಂಗಳು ಪಂಗಳು ಉಳಿಸಿಲ್ಲ
ಇಂದು ನನಗೇ... ಏನೂ ಸಾಕಾಗಲೇ... ಇಲ್ಲ
ಇನ್ನು ನಿನಗೆಲ್ಲಿಂದ ತಂದು ಹಾಕಲಿ
ಈ ಹೊತ್ತಲ್ಲದ ಹೊತ್ತಲ್ಲಿ ಭಿಕ್ಷಾಟಣೆಗೆ ಬರಬೇಕೆ....?
ರ್ರೀ... ನಾನು ರ್ರೀ.... ನಿಮ್ಮ ಪುಷ್ಪಾ...
ಬೇಗ ಬಾಗಿಲು ತೆಗೆಯ ಬಾರದೆ ತುಂಬಾ ಹಸಿವು
ನೋಡಿ ಅಮ್ಮ ಇಲ್ಲೇ... ಸುಸ್ತಾಗಿ ಕೂತಿಹರು
ಹಾಳು ಬಸ್ಸು ಕೈಕೊಟ್ಟು, ಇಷ್ಟು ತಡವಾಯ್ತು
ಮೈಯಲ್ಲ ಬೆವೆತು ಮತ್ತೊಮ್ಮೆ ಬೆಚ್ಚಿ ಬಿದ್ದಿದ್ದೆ,
ಆಗಾದರೆ ನನ್ನ ಪಕ್ಕ ಮಲಗಿದವಳು ಯಾರು ?
ಇವಳೆಲ್ಲಿ...?, ಚಂದ್ರನಂತೆ ಹೊಳೆವ ಅವಳು...!!!
ಆ ನೀಳ ಕೇಶರಾಶಿ, ತುಂಬಿದೆದೆಯಲ್ಲರಳಿದ ಯೌವನ ಹುಣ್ಣಿಮೆಯ ಬೆಳದಿಂಗಳ ರೂಪ ಸೌಂದರ್ಯದ ವದನ
ನನ್ನ ಮನವ ಅರಿತವಳಂತೆ ದೆವ್ವವಿರಬೇಕು ರ್ರೀ...?!
ದೆ ದೆ ದೆ ದೆವ್ವವೇ.... ಬಾಯೆಲ್ಲಾ ಒಣಗಿ
ಮಾತಾಡದೆ ಮೈಮನ ಗರಬಡಿದಿತ್ತು
ಸರಿಯಾಗಿ ನನ್ನ ಕಣ್ಬಿಟ್ಟು ನೋಡ್ರೀ....
ಏನಾದ್ರೂ... ಯಡವಟ್ಟು ಮಾಡ್ಕೊಂಡ್ರೋ... ಹೇಗೆ?
ಗೊತ್ತಲ್ಲ, ಮಾರಿ.......ಹಬ್ಬ!!

" ನೂಪುರ "

ಎಲ್ಲೋ....
ಬರುತಿರುವ
ಅವಳಾಗಮನದ
ಕಾಲ್ಗೆಜ್ಜೆಯ ಅಲೆಗಳಿಗೆ
ಏಕೊ ಏನೋ ನನ್ನೆದೆಯೊಳಗೆ
ಮಿಡಿತದ, ಮಿಂಚಿನ
ಹೊಸ ಪ್ರೀತಿಯ ಸಂಚಲನ ...
ಎಂದೂ... ಕಾಣದ, 
ಹೇಳದ ಚಡಪಡಿಕೆಗೆ
ನರನಾಡಿಗಳಲ್ಲಿ ಪುಟಿದೇಳುವ
ರೋಮಾಂಚನದ ವ್ಯಾಕರಣ...!! 

" ಯಡವಟ್ಟು "....!!! ೨

ಏಕೋ..ಏನೋ.. ನಿದ್ದೆಯಿಲ್ಲದೆ ಒದ್ದಾಡುತ್ತಿದ್ದರೆ
ನನ್ನವಳಿಗೆ ಎಲ್ಲಿಲ್ಲದ ಮುಸಿಮುಸಿ ನಗು
ನನ್ನ ತಲೆಯೊಳಗೆ ಅನುಮಾನದ ಹುಳ ಬಿಟ್ಟು
ಯೋಚಿಸುವಂತೆ ಮಾಡಿ, ಮಗ್ಗುಲ ಬದಲಾಯಿದರೂ
ಹಾಳಾದ್ದು ಹತ್ತಿರ ಸುಳಿಯದು ನಿದ್ದೆ;
ಎದೆ ಎತ್ತರಕ್ಕೆ ಬೆಳೆದು ನಿಂತ ಮಕ್ಕಳಿರುವಾಗ
ಈ ವಯಸ್ಸಲ್ಲಿ ಮತ್ತೊಂದು ಮಗು ಬೇಕಿತ್ತೆ...?
ನಮ್ಮದೇನು ಮಕ್ಕಳಿಲ್ಲದ ಸಂಸಾರವೆ...?
ಇವಳಿಗಾದರು ಒಂಚೂರು ಬುದ್ದಿ ಬೇಡ ?
ಇವಳ ಅಂದು, ಆಡಿಕೊಂಡರೇನು ಬಂತು ಭಾಗ್ಯ !
ಎಲ್ಲಾ.... ನನ್ನಿಂದಾದ ತಪ್ಪುಗಳೆ,
ಉಪ್ಪು, ಹುಳಿ, ಖಾರ ತಿನ್ನುವ ದೇಹ
ಸುಮ್ಮನಿರದೆ ಇಷ್ಟೆಲ್ಲಾ ... ಯಡವಟ್ಟಾಯ್ತು
ನಾನೇ... ಒಂದಷ್ಟು ಎಚ್ಚರ ವಹಿಸಿದ್ದಿದ್ದರೆ ಹೀಗಾಗುತ್ತಿತ್ತೆ? 

ಕಂಡವರು ನಿಲ್ಲಿಸಿ ಕೇಳಿದರೆ ಏನೆಂದು ಉತ್ತರಿಸಲಿ
ಎಲ್ಲರ ಮುಂದೆ ಇನ್ನು ತಲೆಯೆತ್ತಿ ಓಡಾಡುವಂತಿದೆಯೆ? 
ನಡುರಾತ್ರಿಯ ಸುಖ ನಿದ್ದೆಯಲ್ಲಿದ್ದ ನನ್ನವಳ ಎಬ್ಬಿಸಿ
ನಿಜವೇನೇ... ಪಾರು, ನೀ ಬಸಿರಾಗಿರುವೆಯೇ...?
ನಿಮಗೇನು ತಲೆಗಿಲೆ ಕೆಟ್ಟಿದೆಯೇ....?
ತೆಪ್ಪಗೆ ಮಾತಾಡದೆ ಮಲಗಿ, 

ನೀವಿಂತಹ ಬುದ್ದು ಅಂದು ಕೊಂಡಿರಲಿಲ್ಲ
ಕೂಗಾಡಿ ಬುಸುಗುಟ್ಟಿದರು ಬಿಡದೆ
ಬೆಳಿಗ್ಗೆ ಬೇಗ ರೆಡಿಯಾಗು ಡಾಕ್ಟರ್ ಬಳಿ ಹೋಗಿ
ನಿನ್ನ ಹೊಟ್ಟೆಯೊಳಗಿನ ಪಿಂಡ ತೆಗಿಸಿ ಬರುವ
ರ್ರೀ.... ನನಗೆ ಬರುವ ಕೋಪಕ್ಕೆ
ನಾನೇನು ಬಸಿರಾಗಿರುವೆ ಎಂದನೆ...?
ಮುಟ್ಟು ನಿಂತು ಮೂರು ತಿಂಗಳಾಯ್ತೆಂದೆ
ಮುಂದೆ ಮುಟ್ಟಾಗುವ ಕಿರಿಕಿರಿ ಇನ್ನಿಲ್ಲ;
ಒಂದೂ... ಅರ್ಥವಾಗದು ಏನು ಗಂಡಸರೋ... ನೀವು?
ಮತ್ತೆ ಮುಸುಗಿಕ್ಕಿ ನಕ್ಕು ಮಲಗಿದವಳ ಕಂಡು 
ನನ್ನೊಳಗೂ... ನಗೆಬುಗ್ಗೆ ಹರಿಸಿದ್ದಳು....

" ಅರ್ಥವಾಗದವಳು " ೨

ಎಂದೂ.... ಲಟ್ಟಣಿಗೆ ಹಿಡಿದು
ಬಾಗಿಲ ಬಳಿ ಕಾಯದ ನನ್ನವಳು,
ಇಂದೇಕೋ .... ಮುಖವೆಲ್ಲ ಕೆಂಪಾಗಿಸಿ
ಕಣ್ಣ ಅತ್ತಿತ್ತ ಹೊರಳಿಸಿ, ಬುಸುಗುಟ್ಟುವುದ ಕಂಡು;
ನನಗೂ... ಒಳಗೊಳಗೆ ನಡುಕ ಶುರುವಾಗಿ
ನನ್ನಿಂದ ಇಂದೇನಾದರು ಯಡವಟ್ಟಾಯ್ತೆ....?
ಯೋಚಿಸಿದಷ್ಟೂ ... ಎಲ್ಲವೂ ಗೊಜಲುಗೊಜಲು
ಒಂದಕ್ಕೊಂದು ಮುಷ್ಕರ ಹೂಡಿ ನೆನಪಿಗೆ ಬರದು

ಓಹ್ !! ಪಕ್ಕದ ಮನೆಯ ಸುಂದರಿಯ ಜೊತೆ
ಬೆಳಿಗ್ಗೆ ಬೈಕಿನಲಿ ಹೋದದ್ದು ಇವಳೇನಾದರು ಕಂಡಳೆ?
ಆಟೋ ಸ್ಟ್ರೈಕಿಂದ ಆಫೀಸಿಗೆ ಹೋಗಲು
ನನ್ನ ಬೈಕಲ್ಲಿ ಡ್ರಾಪ್ ಕೊಟ್ಟಿದ್ದು ದುರುದೃಷ್ಟವಾಯ್ತೆ?

ಸಂಜೆ ಸಿಗ್ನಲ್ ಬಳಿ ಹೂ ಮಾರುವ ಆ ಹುಡುಗಿ
ಸಾರೂ... ಮೊಳ ಐದೇ... ರೂಪಾಯಿ ಕೊಂಡ್ಹೋಗಿ
ಅಮ್ಮಾವರು ಖುಷಿಯಾಗುವರು ಕಣ್ಣ ಮಿಟುಕಿಸಿ
ಎಷ್ಟೆಲ್ಲಾ... ಕಾಡಿಬೇಡಿ, ಪೀಡಿಸಿದರೂ...
ಕೇಳದೆ ಗದರಿಸಿ ಕಳಿಸಿದ್ದು ನನ್ನದೇ.... ತಪ್ಪು !!

ಒಂದೆರಡು ಮೊಳ ಮಲ್ಲಿಗೆ ಹೂ, ಮೈಸೂರ್ ಪಾಕ್
ತಂದಿದ್ದರೆ ಕರಗಿಬಿಡುತಿದ್ದಳೋ... ಏನೋ ....!!!
ಇಂದು ಇನ್ನೇನು ಕಾದಿದೆಯೋ... ಗ್ರಹಚಾರ
ಬಡಪಾಯಿಯ ಗಂಟಲ ಪಸೆ ಒಣಗಿ
ಇದ್ದಬದ್ದ ದೇವರಿಗೆಲ್ಲಾ... ಹರಕೆ ಹೊತ್ತು
ಹೆಲ್ಮೇಟ್ ತೆಗೆಯದೆ ದೇಶಾವರಿ ನಗೆ ಬೀರಿ
ಹೆ ಹೆ ಹೇ.... ಇದೇನೆ ಪಾರೂ.... ಲಟ್ಟಣಿಗೆ
ನನ್ನ ತಲೆಗೆ ಮೊಟುಕುವೆಯೋ.... ಹೇಗೆ?
ನಿನ್ನ ನೋಡಿದರೆ ತಿಳಿಯದೆ, ನೀ ಅಂತವಳಲ್ಲ ಬಿಡು
ಎಷ್ಟಾದ್ರೂ ನನ್ನ ಮುದ್ದಿನ ಅರ್ಧಾಂಗಯಲ್ಲವೆನೆ

ನನ್ನವಳು ಕಿಲಕಿಲ ನಕ್ಕು, ಹುಸಿ ಕೋಪ ಬೀರಿ
ಸಾಕು ಸುಮ್ಮನಿರಿ ಹೀಗೆಲ್ಲಾ ... ನನ್ನ ಹೊಗಳಿದರೆ
ಥೂ.... ಹೋಗಿ , ಇತ್ತೀಚೆಗಂತು ನೀವು...
ನಿಮಗಿಷ್ಟಾಂತ ಎಣ್ಣೆಗಾಯಿ ಮಾಡಿ ಕಾಯುತ್ತಿರುವೆ
ಆ ಕೆಲಸದ ತಿಮ್ಮಿ ಚಪಾತಿ ಲಟ್ಟಿಸಲು
ಇನ್ನೂ.... ಬರಲೇ.... ಇಲ್ಲ ನೋಡಿ ಎನ್ನಬೇಕೆ!!!

" ಕದ್ದವರು ಯಾರು "....?

ಹೂವಿನ ಕರಗ ಬಂತೆಂದು ಜನ,
ಗೋವಿಂದ ಗೋವಿಂದ ಗೋ... ವಿಂದ
ನೂಕುನುಗ್ಗಲಿನ ತಳ್ಳಾಟದಿ
ಜೋರಾಗಿ ಢೀ ಕೊಟ್ಟಿದ್ದಲ್ಲದೆ
ಎಕ್ಸಟ್ರೀಮ್ಲಿ ವೆರಿ ವೆರಿ ಸಾರಿ ಸರ್
ಅದು ಅದು... ಯಾರೋ... ಹಿಂಬದಿಯಿಂದ ತಳ್ಳಿದರು
ಹಾಗಾಗಿ ನಿಮ್ಮ ಮೇಲೆ ಬಿದ್ದೆ ವೆರಿ ಸಾರಿ
ನಗುತ ಆ ಜನ ಜಂಗುಳಿಯಲ್ಲಿ ಮಾಯವಾದವಳ
ಆ ಮುದ್ದು ಮುಖ ಮತ್ತೇ.. ಕಣ್ಮುಂದೆ ಬಂದು
ಹಾಗೇ... ಮೈಮರೆತವನ, ಒಳ ಮನಸ್ಸು ಎಚ್ಚರಿಸಿ
ಪ್ಯಾಂಟ್ ಜೇಬಿಗೆ ಕೈ ಹಾಕಿದಾಗಲೇ... ಗೊತ್ತಾಗಿದ್ದು
ಜೇಬು ಖಾಲಿ ಖಾಲಿ, ಪರ್ಸ್ ಮಂಗಮಾಯ
ಆ ಮುದ್ದು ಮುಖದ ಹುಡುಗಿ ಕದ್ದೋದಳೇ....?
ಅಥವಾ ಆ ಮಂಗಳ ಮುಖಿಯರ ಗುಂಪೆ...!?
ಎಷ್ಟು ನಾಜೂಕಾಗಿ ಹಿಂಬದಿಗೆ ಬಡಿದು
ಅರೇ.... ಮಾಮೂ.... ತೆಗಿ ತೆಗಿ ದುಡ್ಡು
ಅವರಿಗೇನ್ಗೊತ್ತು ನಾ ಮಫ್ತಿಯಲ್ಲಿರುವ ಪೊಲೀಸ್ಸೆಂದು
ಏಯ್ ... ಸಾಹೇಬ್ರ ಹತ್ರಾನೆ ನಿಮ್ ರೋಲ್ ಕಾಲ
ಹೂಂ... ಹೊರಡಿ ಇಲ್ಲಿಂದ ಲಾಠಿ ಬೀಸಿದ್ದ ಪೀಸಿ....

" ಮಳೆ ನಿಂತು ಹೋದ ಮೇಲೆ "

ದಿನಾ ಸಂಜೆ, ಬಿಸಿಬಿಸಿ ಹಬೆಯಾಡುವ
ಕಾಫಿಯ ಕೊಡುತ್ತಿದ್ದ ನನ್ನವಳು
ಬಂದು ಅರ್ಧ ಗಂಟೆಯಾದರೂ...
ನನ್ನವಳ ಸುಳಿವಿಲ್ಲ, ಕಾಫಿಯೂ ಇಲ್ಲ
ಇಣುಕಿ ಹೋದವಳ ಕಂಡು
ಕುರುಕುಲು ತಿಂಡಿಯ ಜೊತೆಜೊತೆಗೆ
ಕಾಫಿಯ ತರಬಹುದೆಂದು ಕೊಂಡರೆ
ಉಹೂಂ.... ಬರಲೇ.... ಇಲ್ಲ
ನಾ ಕಾದದ್ದಷ್ಟೇ.... ಬಂತು ಭಾಗ್ಯ

ಅವಳ ಕೈಯಿಂದ ರುಚಿಯಾದ
ಕಾಫಿಯ ಕುಡಿದರೇನೆ ನನಗೂ ನೆಮ್ಮದಿ
ಇವಳಿಗೆ ಏನಾಗಿದೆ? ಎಂದೂ... ಇಲ್ಲದ
ನನ್ನ ಮೇಲೆ ತಾತ್ಸಾರ ಇವಳಿಗೆ ಏಕೆ?
ತಲೆ ಕೆಡಿಸಿಕೊಂಡರೆ ನಾ ಕಾಫಿ ಕುಡಿದಂತೆ
ಎಲ್ಲೋ ಏನೋ ... ಯಡವಟ್ಟಾಗಿರಬೇಕು...
ನನ್ನವಳ ಪ್ರೀತಿಯಿಂದಲೇ... ಹತ್ತಿರ ಕರೆದೆ.

ಶೈಲೂ.... ಬೇಗ ಮಾಡಿ ತರಬಾರದೇನೆ
ಅವಳಿಗೆಲ್ಲಿತ್ತೋ... ತಡೆಹಿಡಿದಿದ್ದ ಅಷ್ಟೂ ಸಿಟ್ಟ
ಒಮ್ಮೆಲೆ ಬಿರುಗಾಳಿಯಂತೆ ಬಂದು,
ಕಾಫಿಯ ಲೋಟವ ಟೀಪಾಯ್ ಮೇಲೆ ಕುಕ್ಕಿ;
ಹಾಂ ಬಂದಿರಾ... ಗಂಟೆ ಎಷ್ಟಾಯ್ತು ನೋಡಿ !
ಈಗಾಗಲೇ.... ಗಂಟೆ ಆರಾಯ್ತು
ಮಧ್ಯಾಹ್ನ ಬೇಗ ಬರುವೆ ಎಲ್ಲರೂ ರೆಡಿಯಾಗಿರಿ
ಶೋ ರೂಮಿಂದ ಹೊಸ ಬೈಕ್ ತರುವ ಎಂದೇಳಿ
ಹೀಗೆ ಲೇಟಾಗಿ ಬರುವುದೇ....?!
ಅವಳೆಲ್ಲಿ ಹೋದಳು ಆ ನಿಮ್ಮ ಕೋತಿ...
ಹೆಣ್ಣೆಂಬ ಭಯವೂ... ಇಲ್ಲ, ಭಕ್ತಿಯೂ ಇಲ್ಲ
ಮಗಳ ಮುದ್ದಿಸಿ ತಲೆಯ ಮೇಲೆ ಕೂರಿಸಿ ಕೊಳ್ಳಿ
ನಮ್ಮ ಕೈಗೆ ನಾಳೆ ಚಿಪ್ಪು ಕೊಡುವಳು
ಏನೋ ... ಗಂಡು ಹುಡುಗ ನನ್ನ ಕಂದ
ರಾತ್ರಿಯಾದರು ನನಗೆ ಭಯವಿಲ್ಲ...!!
ಅಣ್ಣ ತಂಗಿ ಹೊಸ Royal Enfield Bikeನ ಮೇಲೆ ಬಂದಾಗ... ಇವಳ ಮುಖ ನೋಡಬೇಕಿತ್ತು....!!
ಚಿತ್ರಕೃಪೆ : ಅಂತರ್ಜಾಲ
ಶಿವಚೆನ್ನ

" ಅರ್ಥವಾಗದವಳು " - ೧

ಅವಳು ಯಾವಾಗಲೂ ಹಾಗೆಯೇ
ಎಲ್ಲರಂತಲ್ಲದಿದ್ದರೂ.....
ಒಮ್ಮೊಮ್ಮೆ ಅರ್ಥವಾಗುವುದೇ... ಇಲ್ಲ,
ಗಂಟೆಗಟ್ಟಲೆ ಫೋನಿನಲ್ಲಿ
ಅದೆಷ್ಟು ಮಾತಾಡುವ ವಾಚಾಳಿಯಂದರೆ
ಇವಳೇನ ಎಂದು ಮೂಗ ಮೇಲೆ ಬೆರಳಿಟ್ಟು ಕೊಳ್ಳಬೇಕು ಕೆಲವೊಮ್ಮೆ ಎದಿರು ಬದಿರು ಸಿಕ್ಕರೂ ಮಾತಾಡದೆ
ಹಾಗೆಯೇ ಸಾಗುವ ನಕ್ಕರೂ ಕಣ್ಣರಳಿಸದ,
ಅಪರಿಚಿತಳಂತೆ ಉಳಿವ ಇವಳು
ಬಾನು ಕೆಂಪೇರಿ, ಹಕ್ಕಿಗಳ ಕಲವರಕ್ಕೆ
ಸೂರ್ಯ ಉದಯಿಸಿದರೂ ಮಾತಾಡದೆ ಬಿಡುವುದೇ... ಇಲ್ಲ
ಛೆ ಹಾಳಾದ್ದು ಆಗಲೇ ಬೆಳಕಾಯ್ತೇ.... 
ಇನ್ನು ನೀ ಮಲಗೋ ಹಾಯಾಗಿ ....
ಕೆಲವೊಮ್ಮೆ  ತುಸು ಇರಿಸು ಮುರಿಸಾದರೂ...
ದಿನ, ವಾರಗಟ್ಟಲೇ ಮಾತಾಡದೆ
ಮೌನಕೆ ಶರಣಾಗಿ ಒಗಟಾಗಿ ಬಿಡುವಳು
ಯಕ್ಷ ಪ್ರಶ್ನೆಯಾಗಿ ಉಳಿದವಳ ಪ್ರೀತಿಗೆ
ಅವಳ ಮನ ಮೋಹಕ ನಗೆಗೆ ಸೋತರೂ
ಇನ್ನೂ ... ನನ್ನಿಂದ ಕಾರಣ ಹುಡುಕಲಾಗಲಿಲ್ಲ...

ನನ್ನ ಮರೆತು ಬಿಡೋ... ಬುದ್ದು.....,
ನಾಳೆ ನನ್ನ ನೋಡಲು ಹುಡುಗನ ಕಡೆಯವರು ಬರುವರು
ನೀನೇ ನಿಂತು ಅವರ ಆದರಿಸಿ, ಉಪಚರಿಸಬೇಕು
ನನಗಾಗಿ ನನ್ನ ಸ್ನೇಹದ ಉಡುಗೊರೆಯಾಗಿ ಬರುವೆಯಲ್ಲಾ....!!
ನಾನವಳ ಮಾತ ಕೇಳಿ ಇಡೀ ರಾತ್ರಿಯೆಲ್ಲಾ ... ಒದ್ದಾಡಿದ್ದೆ
ಅವಳ ಆಲೋಚನೆಯಲ್ಲೇ... ಅವಳ ಮನೆಗೆ ಹೋಗಿ 
ಬೈಯ ಬೇಕೆಂದು ಬೈಕ್ ಅತ್ತಿ ಹೋದವನು
ಸೀದ ಸೇರಿದ್ದು ಆಸ್ಪತ್ರೆ.....,
ಗುಡುಗು ಮಿಂಚಂತೆ ಬಂದವಳು
ಅಯ್ಯೋ .... ಬುದ್ದೂ.... ನೀನೆಂತವನೋ...
ನಾ ತಮಾಷೆಗೆ ಹೇಳಿದ್ದು , ನಿಜವೆಂದು ಕೊಂಡೆಯೋ...ಹೇಗೆ? ಈ ಹೃದಯ ಕಷ್ಟಗಳಿಗೆ ಮರುಗದೆ ಕಲ್ಲಾಗಿರಬೇಕು
ಆಗಲೇ ಪ್ರೀತಿ ಗಟ್ಟಿಯಾಗುವುದು
ಛೆ ಛೇ... ನೀ ಹೀಗೆಲ್ಲಾ ... ಅಳುವುದೆ
ಮುತ್ತಿತ್ತು ಹೋದವಳು ಬಂದದ್ದು
ಬೆಳದಿಂಗಳ ನಡುರಾತ್ರಿಗೆ, "ಫೋನಾಯಿಸಿ "
ನನ್ನೆಲ್ಲಾ .... ನೋವ ಮರೆಸಿದ್ದಳು