Monday, September 1, 2014

" ಸಹಿ - ಕಹಿ - ೧

ಇದೇನೆ ಇದು ವಿಶಾಲು ಬಿಳಿ ಹಾಳೆ, ಪೆನ್ನು
ಯಾರಿಗಾದರು ಪತ್ರ, ದಿನಸಿ ಅಂಗಡಿಗೆ
ಸಾಮಾನುಗಳ ಪಟ್ಟಿ ಬರೆಯಬೇಕಿತ್ತೆ;
ಅಯ್ಯೋ.... ರ್ರೀ ಅದ್ಯಾವುದೂ ಅಲ್ಲವೇ ಅಲ್ಲ
ನಿಮ್ಮ ಹಸ್ತಾಕ್ಷರವ ಸಹಿ ಮಾಡಿ ಕೊಡಿ
ಮೊದಲೇ ಚಿಕ್ಕಮ್ಮ ಕಾಳಿಯ ಉಪಾಸಕರು
ಕೂಲಂಕಷವಾಗಿ ನಿಮ್ಮೆಲ್ಲಾ ಜಾತಕವ ನೋಡಿ
ಚಾಚು ತಪ್ಪದೆ ಮುಂದಿನ ಭವಿಷ್ಯ ಹೇಳುವರು
ಉದ್ಯೋಗ, ಕೀರ್ತಿ, ಮನೆ ಮಕ್ಕಳು, ಜಯ ಅಪಜಯ ಸಂಸಾರದಲ್ಲಿ ದೋಷವಿದ್ದರೆ ಎಲ್ಲಾ ಸರಿ ಮಾಡುವರು ಹೌದೇ...!! ನಿಮ್ಮ ಚಿಕ್ಕಮ್ಮ ಜ್ಯೋತಿಷಿಯೆ ?
ಆದರೂ ನನಗೇಕೋ... ಅನುಮಾನ !
ಮನೆಯ ಮುಂದೆ ಜ್ಯೋತಿಷ್ಯದ ಫಲಕವಿಲ್ಲ
ಯಾರೊಬ್ಬರೂ ಜಾತಕ ಹಿಡಿದು ಬರುವುದಿಲ್ಲ
ಹೀಗಿದ್ದೂ... ನಿನಗೆಂತಹದ್ದೆ ಹುಡುಗಾಟ !
ಸುಮ್ಮನೆ ಬಂದು ಮಲಗು
ಮದುವೆಯಾದ ಹೊಸತರಲ್ಲಿ ಈ ಕಿರಿಕಿರಿ ಬೇರೆ
ರ್ರೀ .... ಸಹಿಯ ಮಾಡುವುದಾದರೆ ಮಾಡಿ
ಇಲ್ಲವಾದರೆ ಬಿಡಿ, ನನಗೇನೂ ಲಾಭವಿಲ್ಲ
ಏನೋ ... ಚಿಕ್ಕಮ್ಮ ಬಂಧುಗಳಿಗೆ, ತಿಳಿದವರಿಗೆ
ಉಚಿತವಾಗಿ ಭವಿಷ್ಯ, ಜಾತಕ, ಶಾಸ್ತ್ರ ಹೇಳುವರು
ನಿಮಗೆ ಅಪಹಾಸ್ಯ, ಕೊಂಕು ನುಡಿ ಬೇರೆ...

ಅಲ್ಲವೆ ಏನೋ... ನಾ ತಮಾಷೆಗೆ ಹೇಳಿದರೆ
ನೀ ಇಷ್ಟಕ್ಕೆಲ್ಲ ಕೋಪಿಸಿಕೊಳ್ಳುವುದೆ
ಸರಿ ಹೋಯ್ತು ಬಿಡು ನನ್ನದೆ ತಪ್ಪು
ಎಲ್ಲಿ ಆ ಖಾಲಿ ಹಾಳೆ, ಹಾಗೆಯೇ ಪೆನ್ನು ಕೊಡು
ಬೇಕಿದ್ದರೆ ನಿನಗಿಷ್ಟ ಬಂದ ಕಡೆ ಬರೆಸಿಕೊ...
ಆ ಹಾ... ಆಸೆ ನೋಡಿ ಆಸೆ ಮೊದಲು
ಇಲ್ಲಿ ಸಹಿ ಮಾಡಿ ಆಮೇಲೆ ಇದ್ದದ್ದೇ
ನನ್ನವಳ ಮಾತುಗಳ ನಿಜವೆಂದು ನಂಬಿ
ಸಹಿಯ ಮಾಡಿದ್ದಕ್ಕೆ ಮುಂದೊಂದು ದಿನ ನನಗೇ.. ತಿರುಗುಬಾಣವಾಗುವುದೆಂದು ನಾ ತಿಳಿದಿರಲಿಲ್ಲ !

1 comment:

  1. ತಿರುಗುಬಾಣವಾಗುವುದೆಂದು ನಾ ತಿಳಿದಿರಲಿಲ್ಲ ! ಎನ್ನುವಾಗಲೇ ನೀವು ನಮ್ಮಂತ ಹುಂಬರೆಂದು prove ಮಾಡಿದಿರಿ.

    ReplyDelete