ವೈಮನಸ್ಸು

ನೀ ಎಂಥಾ ಹಿತ್ತಾಳೆಯ
ಕಿವಿಯವಳೇ, ನಿನ್ನ ಅಮ್ಮ
ಹೇಳಿದಕ್ಕೆಲ್ಲಾ ಕೂಡಲೇ;
ಕೋಲೇ ಬಸವನ ರೀತಿ
ತಲೆಯಲ್ಲಾಡಿಸಿ,
ನಿನ್ನ ಸಂಸಾರವ
ಹಾಳು ಗೆಡವೀಯ, ಜೋಕೆ !
ಈ ಎರಡು ವರ್ಷಗಳಲ್ಲಿ
ನನ್ನ ಜೊತೆ ಸಂಸಾರ
ಮಾಡಿದ್ದು, ಒಂದೆರಡು
ತಿಂಗಳುಗಳಷ್ಟೇ !
ಆಷಾಡ ಮಾಸ ಎಂದೇಳಿ
ಮೂರ್ನಾಲ್ಕು ತಿಂಗಳು
ತವರು ಮನೆಯಲ್ಲಿಯೇ ವಾಸ,
ನನಗೆ ವನವಾಸ ಉಪವಾಸ !
ಅಮ್ಮನಿಗೆ ಮೈಸರಿಯಿಲ್ಲ,
ಅಕ್ಕನ ಬಾಣಂತಾನ,
ನಮ್ಮ ಗ್ರಹಗತಿ ಸರಿಯಿಲ್ಲ
ಎಂದೆಲ್ಲಾ ಕುಂಟು ನೆಪವೇಳಿ
ಪೂಜೆ ಪುನಸ್ಕಾರ, ದೇವರ
ಹೆಸರಲ್ಲಿ ಮನೆ ಮನ ತೊರೆದು
ಬಾಳುವ ಪುಣ್ಯಕ್ಕೆ ನಿನಗೆ
ನನ್ನ ಮದುವೆಯಾಗ ಬೇಕಿತ್ತೆ !