ಚಿರಋಣಿ

ನಾ ತಿನ್ನುವ ಆ ಅನ್ನದ
ಒಂದೊಂದು ಅಗುಳಿನಲಿ
ನನ್ನವಳ ಹೆಸರಿದೆ,
ದುಡಿಮೆಯ ಶ್ರಮವಿದೆ
ಬದುಕಿನ ಕಹಿ ಕತೆಯಿದೆ ॥

ನಾ ತೊಡುವ ಉಡುಪಿನಲಿ
ನನ್ನವಳ ಪ್ರೀತಿಯಿದೆ
ಮಧುರಾತಿ ಸ್ಪರ್ಶವಿದೆ
ನಾ ಹೇಡಿಯೇನಲ್ಲ
ನಾ ಕುಡುಕನೂ ಅಲ್ಲ
ದುಡಿಯಲಾಗದ ಅಪ್ರಯೋಜಕ
ನಡೆಯಲಾಗದ ನಿಸ್ಸಾಹಾಯಕ ॥

ಹೆತ್ತವರನ್ನೇ ದಿಕ್ಕರಿಸಿ
ಶ್ರೀಮಂತಿಕೆಯ ಕಿತ್ತೆಸೆದು,
ಪ್ರೀತಿಸಿದವಳ ಕೈಹಿಡಿಯ
ಹೊರಟವನಿಗೆ, ಆ ವಿಧಿಯ
ಅಟ್ಟಹಾಸದ ಘೋರ ಕ್ರೂರ ನಗೆಗೆ
ಅಘಾತವಾಗಿ, ಅಪಘಾತವಾಗಿತ್ತು ॥

ಯಾರದೋ ಸಹಾಯದಿಂದ
ಆಸ್ಪತ್ರೆಯ ಹಾಸಿಗೆಯಲ್ಲಿದ್ದೆ
ಹೊದ್ದ ಆಸ್ಪತ್ರೆಯ ಹೊದಿಕೆ
ಮೈ ಮುಚ್ಚಿ ನಕ್ಕು ಹೇಳಿತ್ತು
ನಿನಗಿನ್ನಿಲ್ಲ ಎರಡು ಕಾಲು
ಬದುಕಲ್ಲಿ ಸದಾ ಅನುಭವಿಸು
ನೀ ಜೀವನವೆಲ್ಲ ಬರೀ ಗೋಳು ॥

ಓ ದೇವರೆ; ನಿನಗಿದು ಸರಿಯೇ ?
ನಾ ಮಾಡಿದ ಅಪರಾದವೇನು ?
ಅಸಹಾಯಕಳ ಪ್ರೀತಿಸಿದ್ದೆ ?
ನನ್ನವರ ದಿಕ್ಕರಿಸಿದ್ದೇ
ನನ್ನವಳ ಸುಕೃತವೋ
ನಾ ಮಾಡಿದ ಪುಣ್ಯವೋ
ಅಂತೂ ಬದುಕಿರುವೆ ॥