ಮರೆಗುಳಿ

ಇತ್ತೀಚಿನ ನನ್ನ ಮರವಿಗೆ
ದಾರಿ  ತಪ್ಪಿ ಇನ್ಯಾರದ್ದೋ
ಮನೆಯ ಬಾಗಿಲು ತಟ್ಟಿ
ಅಪಹಾಸ್ಯಕ್ಕೆ ಗುರಿಯಾಗಿ
ನಾನೇ ಕಕ್ಕಾಬಿಕ್ಕಿಯಾಗಿದ್ದೆ 
ಪ್ರೊಫೇಸರ್ ಸಾಹೇಬರೇ
ಇದೇನು ಸ್ವಾಮೀ ನೀವಿಲ್ಲಿ
ಪರಿಚಯದವರು ನಕ್ಕರೆ
ಅಪರಿಚಿತರು ಬೈದದ್ದುಂಟು;
ಸಂಜೆಯಾದರೆ ಸಾಕು
ಕುಡಿದು ಗೊತ್ತಾಗದೆ
ತೂರಾಡುವ ಇಂಥಹ 
ಕುಡುಕ ನನ್ನ ಮಕ್ಕಳಿಗೆ  
ಎರಡಿಟ್ಟರೆ ಸರಿ ಹೋಗುವುದು
ಇಲ್ಲಾ ಈ ವಯಸ್ಸಿಗೆ ಅರಳೋ ಮರುಳೊ
ಅಥವಾ ಅಮಾವಾಸ್ಯೆ ಹುಣ್ಣಿಮೆಗೆ ಕೆರಳೊ   
ಇವರಿಗೆ ವಾಸಿಯಾಗದ ಹುಚ್ಚಿರ ಬೇಕು!  

ಅವರ ಮಗನೋ ಮಗಳೋ  
ಅಯ್ಯೋ ಅಪ್ಪಾ ಅವರ ಬಿಡಿ  
ಆ ಎರಡನೇ ಬೀದಿಯಲ್ಲಿರುವ  
ಮ್ಯಾತಮೆಟಿಕ್ಸ್ ಪ್ರೊಫೇಸರ್ 
ತುಂಬಾ ಒಳ್ಳೆಯವರು  
ಪಾಠ ಮಾಡುವುದರಲ್ಲಿ ಎತ್ತಿದ ಕೈ;  
ಹುಚ್ಚೂ ಇಲ್ಲ ಕುಡಿತವೂ ಇಲ್ಲ 
ಸ್ವಲ್ಪ ಮರೆಗುಳಿಗಳಷ್ಟೇ,
ಅಯ್ಯೋ ಸ್ವಾಮೀ,
ನೀವು ಯಾರೆಂದು ಗೊತ್ತಾಗದೆ 
ಯಡವಟ್ಟಾಯಿತು ದಯವಿಟ್ಟು
ನನ್ನನ್ನ  ಕ್ಷಮಿಸಿ ಕ್ಷಮಿಸಿ,
ವಿದ್ಯಾದೇವತೆಯಂತೆ ಬಂದಿರುವಿರಿ 
ದಯಮಾಡಿ ಮನೆಯೊಳಗೆ ಬಂದು 
ಹಾರೈಸಿ, ಕಾಫೀ ತಿಂಡಿಯ ಸ್ವೀಕರಿಸಿ ;
ಈ ನನ್ನ  ಮರೆವಿಗೆ ನಿಮಗೇನಾದರೂ  ।
ಕಾರಣ ತಿಳಿದಿದ್ದರೆ ಬೇಗನೆ ತಿಳಿಸಿ ! 

ಸ್ಪೂರ್ತಿ: ದಾರಿ ತಪ್ಪಿದ ಮಗ